नुवाकोटमा रोपाइँ गर्दै गरेको खेतमा पहिरो गयो, केही व्यक्ति घाइते

नुवाकोट । नुवाकोटको विदुर नगरपालिका–१२ स्थित भट्टगाउँमा रोपाइँ गरिरहेका बेला पहिरोले खेत बगाउँदा केही व्यक्ति घाइते भएका छन् । घाइतेमध्ये ६५ वर्षीय नारायणप्रसाद भट्टको अवस्था गम्भीर छ । 

उनलाई झन्डै ८ सय मिटर तल जंगलमा पहिरोको बीचबाट उद्धार गरिएको थियो । भट्टको काठमाडौंको ग्रान्डी अस्पतालमा उपचार भइरहेको छ ।

सामान्य घाइतेको स्थानीय चारघरे उपस्वास्थ्य चौकीमा उपचार गरिएको छ ।

माथिबाट पहिरो खसेको देखेपछि काम गरिरहेका किसान भागेकाले धेरैको ज्यान जोगिएको प्रहरीको भनाइ छ । 

प्रहरीका अनुसार स्थानीय किसान नोमराज भट्टको खेतमा रोपाइँ गरिरहेका बेला सोमबार एक्कासि ठूलो पहिरो गएको हो । पहिरोले करिब ७ रोपनी खेत पुरै बगाएको नोमराजका छोरा रामशरणको भनाइ छ ।