काठमाडौं । महोत्तरीमा दुई वटा मोटरसाइकल ठोक्किएर आगो लाग्दा तीनजना विद्यार्थीको मृत्यु भएको छ ।
जलेश्वर–बर्दिबास सडकखण्डको बथनाहा गाउँमा आज मंगलबार भएको यो घटनामा उनीहरूको जलेर घटनास्थलमै मृत्यु भएको हो । सो घटनामा थप तीन जना घाइते भएका छन् । घटनामा तीन जनामध्ये दुई जनाको अवस्था गम्भीर र एक जनाको अवस्था मध्यम रहेको प्रहरीले जनाएको छ ।
उनीहरूको सदरमुकाम जलेश्वरस्थित प्रादेशिक अस्पतालमा उपचार भइरहेको छ ।
उनीहरू एसइई परीक्षा दिएर फर्किएका विद्यार्थी रहेको बताइएको छ ।
जिल्ला प्रहरी कार्यालय महोत्तरीका प्रहरी नायब उपरीक्षक (डीएसपी) शैलेन्द्र भट्टले आज बिहान विपरीत दिशाबाट आएका ती मोटरसाइकल जलेश्वर बर्दिबास सडकखण्डको एकडारा गाउँपालिका–५ स्थित बथनाहा गाउँमा एकापसमा ठोक्किएको बताए ।
प्रहरीले मृतक तथा घाइतेमध्ये कसैको नाम, थर, वतन खुलाएको छैन भने मोटरसाइकल पनि पूर्ण रूपमा जलेर नम्बर प्लेट समेत नदेखिने अवस्थामा रहेको जनाइएको छ ।
यो खबर पढेर तपाईलाई कस्तो महसुस भयो ?
प्रतिक्रिया