एकैदिन ‘राइड सेयरिङ’ का १७५ सवारी चालक कारबाहीमा

काठमाडौं । राइड सेयरिङका विभिन्न माध्यमहरुमा लापरबाहीको गुनासोपछि ट्राफिक प्रहरी एक्सनमा उत्रिएको छ ।

पछिल्ला दिनहरुमा राइड सेयरिङका चालकहरुले सेवाग्राहीहरुलाई दुख दिने गरेको गुनासोपछि ट्राफिक प्रहरीले चेकजाँचलाई कडाइ गरेको हो ।

काठमाडौं उपत्यका ट्राफिक प्रहरी कार्यालयले आइतबार एकैदिन १७५ जना राइड सेयरिङ सवारीसाधनका चालकहरुलाई कारबाही गरेको हो ।

कारबाहीमा परेकामध्ये अधिकांशले अनुमति बिना अफलाइन सवारी सञ्चालन गर्ने, जथाभावी यात्रु चढाउने र ओराल्ने मात्र नभएर मापदण्ड विपरितका सवारीसाधन समेत प्रयोग गर्ने गरेको खुलेको छ । त्यस्तै राइड सेयरिङ सवारीसाधनलाई व्यवस्थित रुपमा सञ्चालन गर्न समेत प्रहरीले आग्रह गरेको छ ।