बितेको २४ घण्टामा नेपालमा ६२९ जनामा कोरोना पुष्टि, कुल संक्रमितको संख्या १० हजार ७२८ पुग्यो

काठमाडौं । नेपालमा आज (बुधवार) एकैपटक ६२९ जनामा कोरोना संक्रमण पुष्टि भएको छ ।

योसँगै नेपालमा कुल संक्रमितको संख्या १० हजार ७२८ पुगेको छ । स्वास्थ्य मन्त्रालयको नियमित प्रेस ब्रिफिंगमा मन्त्रालयका प्रवक्ता प्रा. डा. जागेश्वर गौतमले नेपालमा आज एकैपटक ६२९ जनामा कोरोना संक्रमण पुष्टि भएको जानकारी दिए ।

उनका अनुसार आज भेटिएका संक्रमितहरुको स्वास्थ्य अवस्था सामान्य रहेको छ भने उनीहरु सबै चिकित्सकको निगरानीमा रहेका छन् ।

नेपालमा कोरोना भाइरसको संक्रमणका कारण अहिलेसम्म २४ जनाको मृत्यु भईसकेको छ भने २ हजार ३३८ जना स्वास्थ्योपचार पछि निको भएका छन् । आज मात्रै नेपालमा थप ११४ जनाले कोरोनाविरुद्धको लडाई जितेका छन् ।

यसैबीच नेपालमा हिजो मंगलवार एकैपटक ५३८ जनामा कोरोना भाइरसको संक्रमण पुष्टि भएको थियो ।