इजिप्ट र डेनमार्कद्वारा प्यालेस्टिनीहरूलाई विस्थापित नगरी गाजाको पुन:निर्माण गर्न आह्वान 

काठमाडौं । इजिप्टका राष्ट्रपति अब्देल–फताह अल–सिसीले मंगलबार डेनिस प्रधानमन्त्री मेट्टे फ्रेडरिकसेनसँग फोन वार्ता गरेका छन् । वार्ताको क्रममा उनीहरूले गाजा पट्टीमा भएका पछिल्ला घटनाक्रम र यसका बासिन्दाहरूलाई विस्थापित नगरी गाजाको पुन:निर्माणको आवश्यकताबारे छलफल गरेका हुन् । 

दुवै पक्षले युद्धविराम सम्झौताको तीन चरणमा पूर्ण कार्यान्वयन, बन्धक र बन्दीहरूको आदानप्रदान, साथै गाजामा मानवीय सहायतामा तत्काल र निर्बाध पहुँचको महत्त्वपूर्ण आवश्यकतामा जोड दिए । सिसी र फ्रेडरिकसेनले गाजालाई फेरि बस्न योग्य बनाउन, यसको प्यालेस्टिनी जनसंख्यालाई विस्थापित नगरी उनीहरूको अधिकार र आफ्नो भूमिमा बस्नसक्ने क्षमताको रक्षा गर्न पुन :निर्माण सुरु गर्नु अनिवार्य रहेको बताए । 

वार्ताहरूले पूर्वी जेरुसेलमलाई राजधानी बनाएर १९६७ को सिमानामा स्वतन्त्र प्यालेस्टिनी राज्य स्थापना गर्ने महत्वलाई पुनः पुष्टि गरेका छन् । यसलाई स्थायी शान्ति, स्थिरता र इच्छित आर्थिक समृद्धि प्राप्त गर्ने एक मात्र ग्यारेन्टीको रूपमा प्रकाश पारिएको छ ।

अमेरिकी राष्ट्रपति डोनाल्ड ट्रम्पले हालै गाजाको पुनर्विकास गर्ने र यसको जनसंख्यालाई इजिप्ट लगायत छिमेकी देशहरूमा स्थानान्तरण गर्ने सुझाव दिएपछि बढेको चिन्ताको बीचमा यो टिप्पणी आएको हो । विवादास्पद प्रस्तावलाई क्षेत्रीय र अन्तर्राष्ट्रिय स्तरमा व्यापक रूपमा अस्वीकार गरिएको छ । इजिप्टले प्यालेस्टिनीहरूको कुनै पनि जबरजस्ती विस्थापनको विरोध दोहोर्‍याएको छ । गाजामा १५ महिनाभन्दा बढी समयदेखि चलिरहेको घातक द्वन्द्वपछि इजरायल र हमासले जनवरी १९ देखि इजिप्ट, कतार र संयुक्त राज्य अमेरिकाको मध्यस्थतामा युद्धविराम सम्झौता लागू गर्दै आएका छन् ।