कैलाली । न्यू लालीगुँरास ग्रामीण विद्युत सहकारी संस्थाको १७ औँ वार्षिक साधारण सभा सम्पन्न भएको छ । कैलालीको बर्दगोरिया गाउँपालिका वडा नं. ३ स्थित सहकारी संस्थाको शनिबारको भेलाले आर्थिक वर्ष २०७८/०७९ को कुल १० लाख ६३ हजार २८२ रुपैयाँ बराबरको आयव्यय अनुमोदन गरेको छ ।
यस्तै, साधारण सभाबाट संस्थाको रिक्त रहेको कोषाध्यक्ष, सचिव र सदस्य पदमा समेत पदपूर्ति गरिएको छ । जसको उपाध्यक्षमा मसुरा चौधरी, सचिवमा रत्ना विष्ट र सदस्यमा वीरबहादुर राना चयन भएका छन् । ३ सय ८० जना उपभोक्ता रहेको संस्थाको पुँजीगत अनुदान १४ लाख ११ हजार २ सय रुपैयाँ रहेको छ भने, विद्युत संरचना विस्तारमा ५ लाख १६ हजार ७ सय ७६ रुपैयाँ खर्च गरेको संस्थाका प्रवन्धक चक्रबहादुर विष्टले जानकारी दिए ।
संस्था हाल ३ लाख ८ हजार ९ सय ४१ रुपैयाँ मुनाफा रहेको आर्थिक प्रतिवेदनमा उल्लेख छ । संस्थाका अध्यक्ष लोकेन्द्र न्यौपानेको सभापतित्वमा भएको साधारणसभामा प्रमुख अतिथि वडा अध्यक्ष मनऋषि आचार्य रहेका थिए । विशिष्ट अतिथिमा कार्यपालिका सदस्य भिम विश्वकर्मा र न्यायपालिका सदस्य बसन्ती साउँद रहेकी थिइन् ।
सो अवसरमा संस्थाको आयव्यय पारदर्शी रहेको भन्दै वडा अध्यक्ष मनऋषि आचार्यले धन्यवादसमेत दिए । संस्थाको विकास र नियमित विद्युत सेवा आपूर्तिका लागि आगामी आर्थिक वर्ष २०८०/०८१ मा नयाँ ट्रान्समिटर खरिदमा लागि आवश्यक बजेट विनियोजन गर्ने प्रतिवद्धता जनाए ।
कार्यक्रममा शिवशक्ति ग्रामीण विद्युत सहकारी संस्थाका अध्यक्ष आत्मा प्रसाद जैशी, दानुफाँटा नमुना सामुदायिक वनका अध्यक्ष टेकराज जोशी, रानीजरुवा सामुदायिक वन उपभोक्ता समितिका अध्यक्ष लालसिंह विश्वकर्मा, पञ्चकोषी कृषि सहकारीकी अध्यक्ष दीपा गुरुङ लगायतले शुभकामना मन्तव्य राखेका थिए । संस्थाकी कोषाध्यक्ष जमुना नेपालीले स्वागत मन्तव्य राखेको कार्यक्रमको सञ्चालन केके युवा क्लबका उपाध्यक्ष डम्मर जोशीले गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया