गण्डकी । गण्डकी प्रदेशका मुख्यमन्त्री खगराज अधिकारीले फेवातालको संरक्षणमा जलाधार क्षेत्रले महत्वपूर्ण भूमिका निर्वाह गरेको बताएका छन् ।
चापाकोट पर्यटन प्रवर्द्धन समिति पोखरा–२३ द्वारा आयोजित तेस्रो चापाकोट देउराली सामुदायिक होमस्टे सांस्कृतिक महोत्सवको आज उद्घाटन गर्दै उनले जलाधार क्षेत्रका बासिन्दाले पनि फेवातालबाट आम्दानी लिन सक्ने योजना अघि बढाउनुपर्ने बताए ।
फेवाताल जलाधार क्षेत्रको संरक्षण गर्ने स्थानीय बासिन्दा फाइदा लिने तल्लो तटीय क्षेत्र भएको उल्लेख गर्दै उनले अन्न भण्डार चापाकोट क्षेत्रको उत्पादनलाई लेकसाइड बजार बनाउनुपर्नेमा जोड दिए ।
उत्पादनमा जोड दिएर प्रदेशलाई खाद्यमा आत्मनिर्भर हुने खालका योजना अघि बढाउने प्रतिबद्धता व्यक्त गर्दै मुख्यमन्त्री अधिकारीले त्यसका लागि तीनै तहका सरकार जिम्मेवार भएर लाग्नुपर्ने आवश्यकता औँल्याए ।
निवर्तमान गण्डकी प्रदेशसभा सदस्य राजीव पहारीले पोखरा–२३ को विकास मेला महोत्सवले स्थानीय उत्पादनको बजारीकरण गर्दै समग्र विकासमा टेवा पुग्ने विश्वास व्यक्त गरे ।
समितिका अध्यक्ष भीम पराजुलीको अध्यक्षतामा भएको कार्यक्रममा पोखरा–२३ का वडाध्यक्ष रामकाजी गुरुङ, सवमाजसेवी शिवलाल पराजुली, महोत्सव संयोजक चतनाथ देवकोटालगायतले पर्यटन प्रवर्द्धनमा होमस्टेले महत्वपूर्ण भूमिका खेल्दै आएको धारणा राखे ।
यही २८ गतेसम्म सञ्चालन हुने महोत्सवमा नौमती बाजा प्रतियोगितातर्फ प्रथमलाई रु ३३ हजार तीन सय ३३, द्वितीयलाई रु २२ हजार दुई सय २२, तृतीयलाई रु ११ हजार एक सय ११ र सान्त्वनालाई रु पाँच हजार पाँच सय ५५ ले पुरस्कृत गरिनेछ ।
भजन प्रतियोगितातर्फ प्रथमलाई रु ३३ हजार तीन सय ३३, द्वितीय रु २२ हजार दुई सय २२, तृतीय रु ११ हजार एक सय ११ र सान्त्वनालाई रु पाँच हजार पाँच सय ५५ पुरस्कार प्रदान गरिनेछ । त्यसैगरी रत्यौली प्रतियोगितातर्फ प्रथमलाई रु ३३ हजार तीन सय ३३, द्वितीय २२ हजार दुई सय २२, तृतीय रु ११ हजार एक सय ११ र सान्त्वनालाई रु पाँच हजार पाँच सय ५५ ले पुरस्कृत गरिने छ ।
पुरुष दौड प्रतियोगितामा पहिलो हुनेलाई पाँच हजार, द्वितीय हुनेलाई रु तीन हजार, तृतीयलाई रु दुई हजार र सान्तवनाका लागि रु एक हजार पुरस्कारको व्यवस्था गरिएको छ । महिला दौड प्रतियोगिमा पहिलो हुनेलाई रु पाँच हजार, द्वितीय रु तीन हजार, तृतीयलाई रु दुई हजार र सान्त्वनालाई रु एक हजार पुरस्कारको व्यवस्था गरिएको अध्यक्ष भीम पराजुलीले जानकारी दिए ।
महोत्सवमा बाल नृत्य, दुना टपरी बुन्ने, झाँकी, घैटो फुटाउनेलगायतका विभिन्न प्रतियोगिता समावेश गरिएको उनको भनाइ छ ।
