खाद्य प्रविधिका इन्जिनियर योगेन्द्र ढुंगेल अख्तियारको नियन्त्रणमा

काठमाडौं । खाद्य प्रविधि तथा गुण नियन्त्रण विभागका इन्जिनियर योगेन्द्र ढुंगेल सेवाग्राहीसँग घुस लिँदै गर्दा पक्राउ परेका छन् । अख्तियार दुरुपयोग अनुसन्धान आयोग, टंगालको टोलीले उनलाई नियन्त्रणमा लिएको हो ।

खाद्य विभागले दिने अनुज्ञापत्र लिन आउने सेवाग्राहीसँग भण्डारीले १ लाख ५० हजार घुस लिँदै गर्दा आयोगबाट खटिएको टोलीले उनलाई नियन्त्रणमा लिएको छ । विभागको मुख्य कार्यालय बबरमहलमा आठौं तहमा कार्यरत ढुंगेलले मिनरल वाटर उत्पादन गर्ने कम्पनीका लागि अनुज्ञापत्र लिन गएका व्यवसायीसँग घुस मागेका थिए ।

घुस लिएर कार्यालयबाट निस्किने क्रममा उनी पक्राउ परेका हुन् । झापाको दमक घर भएका ढुंगेल भक्तपुरको बालकोट बस्दै आएका छन् । आरोपीबारे अनुसन्धान भइरहेको अख्तियार दुरुपयोग अनुसन्धान आयोगका प्रवक्ता एवं सह–सचिव श्यामप्रसाद भण्डारीले जानकारी दिए ।