अज्ञात समूहको गोली प्रहारबाट धनुषामा एक पसलेको मृत्यु

जनकपुरधाम । धनुषामा अज्ञात समूहको गोली प्रहारबाट एक जनाको ज्यान गएको छ । आफ्नै घरमा रहेको किराना पसलमा बसिरहेको अवस्थामा मोटरसाईकलमा आएको समूहले गोली चलाउँदा ३५ वर्षीय भनु दासको मृत्यु भएको हो ।

सिमावर्ती मुखियापट्टी मुसहर्निया गाउँपालिका २ मा दासमाथि गोली प्रहार भएको प्रहरीले जनाएको छ । मृतक दासको काखमा गोली लागेको छ र गोली लागेर गम्भीर घाइते उनलाई जनकपुरस्थित प्रादेशिक अस्पताल लग्ने क्रममा बाटोमै मृत्यु भएको हो ।

मोटरसाइकलमा आएका व्यक्ति भने उनीमाथि गोली प्रहार गरी भारततर्फ फरार भएको बताइएको छ ।