१. आज तिहारको दोस्रो दिन अर्थात कुकुर तिहार, बिहान कुकुरको पूजा गरि मनाइयो, बेलुका भने धनधान्यकी देवी लक्ष्मीको पूजा आराधना गरी मनाइँदै ।
२. गठबन्धनका कारण कोही पनि राष्ट्र र राष्ट्रिय एकताको विरुद्धमा जान नसक्ने प्रधानमन्त्री शेरबहादुर देउवाको भनाइ, गठबन्धनलाई टिकाएर देश विकासको बाटोमा जानुपर्नेमा जोड ।
३. हरेक १५ वर्षपछि जनतामा नैराश्यता आउनुमा राजनीतिक नेतृत्व दोषी हुने गरेको नेकपा माओवादी केन्द्रका अध्यक्ष प्रचण्डको भनाइ, राजनीतिक दलहरुले जनताका एजेन्डालाई प्रमुख बनाउन नसक्दा सुशासन कायम हुन नसकेको स्वीकार ।
४. चुनावी प्रचारमा हेलिकोप्टरको प्रयोग गर्न नदिने निर्वाचन आयोगको निर्णय, पद, पैसा, पहुँच र प्रलोभनबाट निर्वाचन प्रभावित हुन नहुने प्रमुख निर्वाचन आयुक्त दिनेशकुमार थपलियाको भनाइ ।
५. निर्वाचन आयोगले दिएको समयसीमा अगावै राजनीतिक दलहरुले थाले चुनावी अभियान, कांग्रेस सहितको गठबन्धनदेखि एमाले सहितको गठबन्धनले चियापानको नाममा निर्वाचन लक्षित कार्यक्रम आयोजना ।
६. पदाधिकारी र नेताहरुको व्यस्तताको कारण आज पनि नेपाली कांग्रेसले गर्न सकेन घोषणापत्र सार्वजनिक, पटकपटक मिति तोकिँदै स्थगित हुँदै, अब तिहारपछि मात्रै सार्वजनिक गरिने ।
७. लक्ष्मीपूजामा स्वदेशकै बिद्युत्ले देश झलमल, नेपालमा उत्पादन नै १८ सय मेगावाट आसपास हुने भएकाले माग व्यवस्थापनमा समस्या नहुने विद्युत प्राधिकरणको भनाइ, ७ सय प्राविधिक स्ट्याण्डबाइ ।
८. रातको समयमा सडकमा फोहोर फाल्नेहरुमाथि काठमाडौं महानगरले थाल्यो निगरानी, रातभर महानगरका विभिन्न स्थानमा महानगर प्रहरीको गस्ती, ३ महिनामा मात्रै उठ्यो ४ लाख जरिवाना ।
९. महाकवि लक्ष्मीप्रसाद देवकोटाको ११४औँ जन्मजयन्ती विभिन्न कार्यक्रम गरि मनाइयो, देवकोटाको कृतित्व र व्यक्तित्वले नेपाललाई अन्तर्राष्ट्रिय स्तरमा चिनाएकोबारे प्रशंसा ।
१०. नेपालमा पछिल्लो २४ घण्टामा गरिएको ९ सय २१ परीक्षणमा थप ४२ जनामा कोरोना संक्रमण पुष्टि, १ जनाको मृत्यु हुँदा ४३ जना संक्रमण मुक्त, सक्रिय संक्रमितको संख्या ६९२ पुग्यो ।
११. वाणिज्य बैंकहरुले गरे चालु आर्थिक वर्ष २०७९÷८० को पहिलो त्रैमासको वित्तीय रिपोर्ट सार्वजनिक, कुल २६ वटा वाणिज्य बैंकहरुले तीन महिनामा कमाए १८ अर्ब ७५ करोड नाफा ।
१२. सोमाली सहर किस्मायुको एउटा होटलमा कार बम र गोलीबारीमा नौ जनाको मृत्यु, अलकायदासँग सम्बन्धित अल शबाब लडाकु समूहले आक्रमण गरेको आशंका ।
१३. अफगानिस्तानको उत्तरी बदख्सान प्रान्तमा हालै गरेको सुरक्षा कारबाहीमा परी ३८ विद्रोही मारिए, अन्य ७८ जना पक्राउ ।
१४. अष्ट्रेलियामा जारी टी–२० विश्वकप अन्तर्गत सुपर १२ मा बंगलादेशले नेदरल्याण्डस्लाई ९ रनले हरायो, २४ रन खर्चेर ४ विकेट लिएका तस्किन अहमद बने प्लेयर अफ द म्याच ।
१५. नवौं राष्ट्रिय खेलकुद प्रतियोगितामा उडानको दौरान निसिम थापाको निधन भएपछि रोकिएको प्याराग्लाइडिङको उडान आजबाट खुल्ला, नागरिक उड्डयन प्राधिकरणले राख्यो ५ शर्त ।
यो खबर पढेर तपाईलाई कस्तो महसुस भयो ?
प्रतिक्रिया