अमरनाथ गुफा विपद् अपडेट : १६ तीर्थयात्रीको शव भेटियो, ४० जना अझै बेपत्ता

काठमाडौं । हल्का वर्षाको बीच टेन्ट सिटीमा यात्रुहरूको भीड थियो। करिब पाँच हजार भक्तजनमध्ये कोही दर्शनका लागि आएका थिए भने कोही दर्शन गरेर फर्कने क्रममा थिए । ‘बम-बम भोले’को नाराका बीच बादलको चर्को गर्जन थियो, तर पवित्र गुफाबाट केही दूरीमा बादल पल्टिएर टेन्ट सिटी डुबानमा परेको कसैलाई थाहा थिएन।

भक्तजनहरू गुफाको ठीक अगाडि समतल क्षेत्रमा बनेको टेन्ट सिटीमा घुम्ने र फर्कने तयारी गरिरहेका थिए। यसैबीच पानीको आवाज आउन थाल्यो । गुफाको देब्रेपट्टि माथिदेखि तलसम्म पानीको ठूलो धारा आयो। गुफाको अगाडि बग्ने नालीमा अन्य धेरै ठाउँबाट पनि तीव्र गतिमा पानी आउन थाल्यो ।

विगत १२ वर्षमा अमरनाथ यात्राका क्रममा गुफा नजिकै तीनपटक बादल फुट्ने घटना भइसकेका छन् तर त्यति ठूलो क्षति कहिल्यै भएको छैन। बादल फुटेर यति धेरै मानिसको ज्यान गएको यो पहिलो पटक हो भने कैयौं अझै बेपत्ता छन् । अमरनाथ यात्रामा तैनाथ केही अफिसरले सबै सामान्य भइरहेको बताएका भएपनि स्थीती सामान्य भने पक्कै छैन ।

जानकारीका अनुसार सन् २०१० मा पनि गुफा नजिकै बादल फुटेको थियो तर त्यसबेला पनि कुनै क्षति भएको थिएन । सन् २०२१ जुलाई २८ मा गुफा नजिकैको बादल पड्किँदा तीनजनाको उद्धार गरिएको थियो । यसमा कुनै हताहत भएको थिएन । यसपटक बादल पड्किएर धेरै क्षति भएको छ ।

अमरनाथ गुफा नजिकैको बादलबाट एक घण्टामा यति धेरै पानी पर्यो, जुन पाँच घण्टामा पनि पर्दैन। यति मात्र होइन, गुफा वरपरका शिविरहरूमा पानी परेको थिएन, तर गुफामा भारी वर्षा भएको थियो। यसैबीच बादल फट्यो र विनाश भएको प्रहरी अधिकारीहरु बताउछन् ।

अहिलेसम्म १६ भक्तजनको मृत्यु भएको पुष्टि भएको छ भने करिब ४० जना बेपत्ता र ५० भन्दा बढी घाइते भएका छन् । सेना, एनडीआरएफ र एसडीआरएफ सहित विपद् व्यवस्थापनसँग सम्बन्धित धेरै टोलीहरू निरन्तर राहत र उद्धार कार्यमा संलग्न रहेका भारतीय सञ्चार माध्यमहरुले जनाएका छन् ।