यी तीन पालिका जसको बागडोर महिलाको हातमा छ

काठमाडौं । यस पटकको निर्वाचनमा देशभरका ३ पालिकामा प्रमुख र उपप्रमुख दुवै पदमा महिला उम्मेदवार निर्वाचित भएका छन् ।

झापाको गौरीगञ्ज गाउँपालिका प्रमुखमा फूलवती राजवंशी र उपप्रमुखमा पूजन न्यौपाने कुँवर निर्वाचित भएका छन् । राजवंशी नेपाली काँग्रेसबाट उम्मेदवार थिइन् भने उपप्रमुख न्यौपाने नेकपा एमालेबाट उम्मेदवारी दिएकी थिइन् ।

त्यस्तै दैलेखको भैरवी गाउँपालिकाको प्रमुख र उपप्रमुख दुवै पदमा पनि महिला नै निर्वाचित भएका छन् । दुवै जनाले काँग्रेसबाट उम्मेदवारी दिएका थिए । गाउँपालिकाको अध्यक्षमा रीता शाही र उपाध्यक्षमा देवी भण्डारी निर्वाचित भएका छन् ।

कैलालीको लम्की–चुहा नगरपालिकाको प्रमुख र उपप्रमुखमा क्रमशः सुशीला शाही र जुना चौधरी निर्वाचित भएका छन् । नगरपालिकाको प्रमुख बनेकी सुशीला शाहीले नेपाली काँग्रेसबाट उम्मेदवारी दिएकी थिइन् भने उपप्रमुमा जित निकालेकी जुना चौधरीले एमालेबाट उम्मेदवारी दिएकी थिइन् ।

साथै यसपटकको स्थानीय तह निर्वाचनमा १४ हजारबढी महिला उम्मेदवार निर्वाचित भएका छन् । निर्वाचन आयोगको अनुसार ५५ हजार ६९९ महिला उम्मेदवार रहेकोमा १४ हजार ४०२ महिला निर्वाचित भएका हुन् ।