वाम एकताको कोर्स कम्लिट, एमाले–माओवादी एकता घोषणा

काठमाडौं । एकता गर्ने भनिएको ९ महिनापछि एमाले र माओवादीबीच एकता घोषणा गरिएको छ । गत असोज १७ गते दुई पार्टीबीच चुनावी गठबन्धन गरिएको थियो भने निकट भविष्यमा एकता गर्ने भनिएको थियो । 

सोहिअनुसार विभिन्न चरणको छलफल हुँदै आज राष्ट्रियसभागृहमा एक कार्यक्रमका बीच एकता घोषणा गरियो ।  एकीकृत पार्टीको नाम नेपाल कम्युनिष्ट पार्टी राखिएको छ  भने  अध्यक्ष प्रचण्ड र केपी ओली नै रहेका छन् । पार्टीको चुनाव चिन्ह सूर्य राखिँदा केन्द्रीय समिति भने ४४१ सदस्सीय बनाइएको छ । जसमा एमालेबाट २४१ र माओवादीका २०० सदस्य अटाएका छन् । यसैगरी  स्थायी कमिटी ५४ सदस्सीय बनाइँदा एमालेका २६ र बाँकी माओवादीका रहेका छन् ।

नवगठित नेपाल कम्युनिष्ट पार्टीका अध्यक्षमध्येका एक पुष्पकमल दाहाल ‘प्रचण्ड’ले कम्युनिष्ट पार्टीहरुको फुटको इतिहासमा क्रम भंग भएको बताएका छन् । अब कम्युनिष्ट पार्टी नफुट्ने भन्दै उनले भने, ‘अक्सिजन र हाइड्रोजन मिलेर पानी बन्यो, अब पानीमा अक्सिजन र हाइड्रोजन छुट्याउन सकिँदैन । अब माओवादी केन्द्र र एमाले मिलेर नयाँ पार्टी बन्यो, अब यहाँ एमाले र माओवादी केन्द्र छुट्याउन सकिँदैन ।’ यसैबिच प्रधानमन्त्री तथा नवगठित नेकपाका अर्का अध्यक्ष केपी शर्मा ओलीले नेपाल अब विकासको गतिमा अगाडि बढेको बताएका छन् । उनले भने, ‘अब कम्युनिष्ट अगाडि बढ्यो, देश अगाडि बढ्यो ।’ सरकारसँग यसअघि एक्लै बहुुमत नभएकोमा अब पार्टीको एक्लै बहुमत भएको, ६ वटा प्रदेशमा मिलिजुली सरकार रहेकोमा अब एक्लै बहुमत रहेको, पपुलर भोटमा एक्लै बहुमत रहेको, स्थानीय तहहरुमा एक्लै बहुमत रहेको सम्झाउँदै उनले भने, अब कसैले हल्लाउन र ढाल्न नसक्ने गरी एकल बहुमत छ । उनले भने, ‘कांग्रेसहरु आत्तिनु पर्दैन ।’ स्याउको रुखबाट पात झर्न थालेपछि रुख म¥यो कि भन्ने मान्छेहरुले पनि स्याउ लटरम्म फल्न थालेपछि यथार्थ कुरा थाहा पाई स्पष्ट हुने बताउँदै प्रम ओलीले भने, ‘अब कम्युनिस्ट आन्दोलनमा नो विन्टर सिजन ।’