सरकारले सर्वेन्द्रलाई आईजीपी बनाएपछि रमेश खरेल आक्रोशित

काठमाडौं, २८ चैत– नेपाल प्रहरीका डिआईजी सर्वेन्द्र खनाललाई सरकारले आईजीपीमा बढुवा गरेपछि अर्का दाबेदार डिआईजी रमेश खरेल आक्रोशित बनेका छन् ।आफूले राजीनामा दिने मनस्थिति बनाएको खरेलले बताएका छन् । उनले आफू आईजीपी बन्नु पर्ने बताउँदै आएका थिए ।उनले भनेका छन्, ‘पद्धति बसाएर निर्णय गर्नुपर्छ । भागबन्डा नहुने भए मात्र प्रहरीभित्र पनि असल संस्कार बस्न सक्छ । म भलिबल खेलाडीका रूपमा प्रहरी जवान भई यो संगठनमा छिरेको हुँ । प्रहरी जवानकै रूपमा प्रवेश गर्दा पनि म एक दिन शीर्षस्थ स्थानबाट नेपाल प्रहरीलाई हाँक्छु भन्ने सपना देखेको थिएँ । त्यही सपना पूरा गर्न मैले जानजान गल्ती कहिल्यै गरिनँ । तर, त्यो अवसर पाइनँ । हीन भावना बोकेर बसेँ भने पनि संगठनलाई शतप्रतिशत नतिजा दिन सक्दिनँ । त्यसैले बिदा हुने निर्णय गरेको छु ।’मंगलबार बसेको मन्त्रिपरिषद्को दोस्रो बैठकले सर्वेन्द्रलाई नेपाल प्रहरीको आईजी र शैलेन्द्र खनाललाई सशस्त्र प्रहरीको आईजीमा बढुवा गर्ने निर्णय गरेको थियो ।