प्रधानमन्त्री केपी शर्मा ओलीले मधेशका माग सम्बोधन गर्ने प्रतिवद्धता जनाएको भन्दै सरकारमा गएको जनता समाजवादी पार्टी (जसपा)को अध्यक्ष महन्थ ठाकुर पक्ष सरकारबाट हटेसँगै अलमलमा परेको छ ।
प्रधानमन्त्री ओलीले संविधान संशोधन, नागरिकता, मधेश आन्दोलन ताका मुद्दा लगाइएका आफ्ना नेता कार्यकर्ताका मुद्दा फिर्ता लिन पहल कदमी गरेको भन्दै पार्टीमा विवादका बावजुद ठाकुर पक्ष गत जेठ २१ र २७ मा सत्तामा उक्लिएको थियो । तर सत्तामा उक्लिएको १८ दिनमै ठाकुर पक्ष सरकारबाट ओर्लिनु परेको छ ।
सर्वोच्च अदालतले प्रतिनिधि सभा विघटन गरेर निर्वाचनको मिति समेत घोषणा भइसकेको अवस्थामा प्रधानमन्त्री ओलीले मन्त्रिपरिषद् विस्तार गरेको भन्दै मंगलवार त्यसलाई बदर गरेको छ । मन्त्रिपरिषद् विस्तार बदर भएसँगै ठाकुर पक्षबाट सरकारमा गएका ११ जना मन्त्रीको पद पनि गएको छ । प्रधानमन्त्री ओलीले दोस्रोपटक गरेको प्रतिनिधि सभा विघटन विरुद्धको मुद्धा सर्वोच्च अदालतमा पुगेको छ । त्यसमा सर्वोच्चमा आजबाट सुनुवाइ शुरु भएको छ ।
प्रधानमन्त्री ओलीले यसअघि गत पुस ५ मा पनि पहिलो पटक प्रतिनिधि सभा विघटन गरेका थिए । तर त्यसलाई फागुन ११ मा सर्वोच्चले पुर्नस्थापना गरिदियो । ओलीले दोसेपटक फेरि जेठ ७ मा दोस्रोपटक प्रतिनिधि सभा विघटन गरे । ओलीले पहिलोपटक प्रतिनिधि सभा विघटन गर्दा विरोध गरेको ठाकुर पक्ष दोस्रो पटक भने बिघटन सही भएको भन्दै सरकारमा गयो । जसपाका एक नेताका अनुसार जसपाका केही नेतामा मन्त्री भएर चुनाव लड्दा चुनाव जितिन्छ भन्ने मनोविज्ञान थियो ।
अर्का अध्यक्ष उपेन्द्र यादवको असहमतिका बावजुद ठाकुर पक्ष सरकारमा गएको थियो ।
प्रधानमन्त्री ओलीलाई त ठाकुर पक्षलाई सरकारमा लैजानु आफू प्रधानमन्त्रीमै रहिरहन सजिलो होस भन्ने हो । किनकि भोली यदि प्रतिनिधि सभा पुर्नस्थापना भएको खण्डमा बहुमत पुर्याउन ठाकुर पक्षका सांसद प्रयोग गर्नुपर्नेछ ।
यादव पक्षले दुई पटक प्रतिनिधि सभा विघटन गरेका ओलीलाई साथ दिनुहुँदैन भन्ने अडान राख्यो । तर ठाकुर पक्षले भने ओलीले मधेशका मुद्धा सम्बोधन गर्ने प्रतिवद्धता जनाएको भन्दै सरकारमा गयो ।
त्यसअघि ओलीले ठाकुर पक्षलाई सरकारमा जान सहज होस् भनेर जेठ ९ मा नागरिकता सम्बन्धी अध्यादेश जारी गरे, अध्यादेश विरुद्ध सर्वोच्चमा मुद्दा पर्यो। उक्त मुद्दामा सुनुवाइ गर्दै २७ जेठमा सर्वोच्चले त्यसलाई तत्काल कार्यान्वयन नगर्न आदेश दियो ।
अब तत्कालका लागि ठाकुर पक्षलाई सरकारमा उक्लिन र आफ्ना माग अघि सार्न सहज देखिएको छैन । ठाकुर पक्ष सरकारमा नरहेको अवस्थामा अब ओली र ठाकुरको समीकरण के होला ? विग्रहको अवस्थामा पुगेको जसपामा ठाकुर कसरी अघि बढ्लान ? ठाकुर पक्षका नेता डाक्टर सुरेन्द्र झा ओलीसँगको आफूहरुको गठबन्धन नभत्किएको दाबी गर्छन् । प्रतिनिधि सभा विघटनको मुद्दामा सर्वोच्चले के गर्छ अनि मात्रै समीकरणबारे थप स्पष्ट हुने उनको भनाई छ । “नागरिकता अध्यादेश र मन्त्रिपरिषद विस्तारमा फैसला गर्दा त्यसको दुरगामी असरलाई सर्वोच्चले हेर्नुपर्थ्यो”, झा भन्छन,“तर अदालतको आदेश सबैले मान्नै पर्छ ।”
उता जसपाको आन्तरिक विवादबारे निर्णय लिने जिम्मा फेरि निर्वाचन आयोगको काँधमा पुगेको छ । ठाकुर र यादवले एक अर्कालाई कारवाही गरेको र आ–आफूले पार्टीको आधिकारिकता पाउनु पर्ने माग गर्दै निर्वाचन आयोगमा दोस्रो पटक माग गरेका छन् । त्यसअघि यादवले पार्टीको कार्यकारिणी समितिको बहुमतले ठाकुरलाई पार्टीबाट निष्काशन गरेको पत्र आयोगमा दर्ता गरेका थिए ।
ठाकुरले भने यादवलाई बहुमतले कारवाही गरेको प्रमाणित गर्न सकेका थिएनन् । तर ३० जेठमा यादवले ठाकुरलाई बहुमतले कारवाही गरेको भएपनि दुबैले एक अर्कालाई कारवाही गरेको नमिलेको भन्दै आयोगले निर्णय गरेको थियो ।
पहिलो पटक एक अर्कालाई पार्टीबाट हटाएकाले आयोगको दलसम्बन्धि किताव अद्यावधिक गर्न दुवैले माग गरेका थिए । तर अहिले पार्टीको आधिकारिकताका विषयमा निर्णय गरिदिन आयोगसँग माग गरिएको हो । अहिले पनि यादव पक्षले बहुमतको निर्णयले आयोगमा पत्र दर्ता गरेको बताएको छ । दुबैको मागदाबीबारे आयोगले केही दिन अघि प्रक्रिया अघि बढाएको छ,तर आयोगको निर्णय आउन ४५ दिन भन्दा बढी समय लाग्ने बताइएको छ । आयोगले अब के गर्छ अनि त्यसपछि मात्रै अवस्था हेरेर अघि बढ्ने झा बताउँछन् ।
ओलीलाई समर्थन गर्ने कि नगर्ने भन्ने विषयमा जसपाभित्र विवाद उत्कर्षमा पुगेर पार्टी नै विग्रहको अवस्थामा पुगेको हो । यादव पक्षका नेता मोहम्मद इस्तियाक राई ठाकुरसहित केही व्यक्तिहरु अहिलेको व्यवस्था र उपलब्धीलाई समाप्त पार्ने षडयन्त्रमा लागेका प्रधानमन्त्री ओलीलाई सहयोग गर्न पुगेकाले उनीहरुबाट अब पार्टीको हित नहुने बताउँछन् ।
मोहम्मद इस्तियाक राई, नेता जसपा
ठाकुर सहित नेता राजेन्द्र महतो, लक्ष्मणलाल कर्ण, सर्वेन्द्रनाथ शुक्ललाई पार्टीको बहुमतले कारवाही गरिसकेको र उनीहरुले कीर्ते माइन्यूट बनाएर निर्वाचन आयोगमा आधिकारिकता दाबी गर्न जानु हास्यास्पद भएको राईको भनाई छ ।
जसपाको आन्तरिक कलह हेर्दा अब दुबै पक्ष मिलेर अघि बढ्लान भन्ने अवस्था तत्कालका लागि देखिदैन् । जसपामा ठाकुर पक्ष अहिले न सत्तामा न विपक्षमा भन्ने अवस्थामा पुगेको छ । सत्ता पनि गुम्यो,आफ्नै पार्टीमा विग्रह पनि आयो ।
यो खबर पढेर तपाईलाई कस्तो महसुस भयो ?
प्रतिक्रिया