काठमाडौं । चालू आर्थिक वर्ष (आव) २०७७/७८ को कात्तिकको तुलनामा मङ्सिरमा घटेको विदेशी विनिमय सञ्चिति पुस मसान्तसम्म आइपुग्दा बढेर नयाँ उचाइमा पुगेको छ । पुस मसान्तसम्म कुल विदेशी विनिमय सञ्चिति १२ अर्ब ७८ करोड डलर पुगेको छ, जुन डलरको आधारमा हालसम्म कै उच्च हो ।
यसअघि गत कात्तिकमा विदेशी विनियम सञ्चितिले १२ अर्ब ६५ करोड डलरमा पुगेर नयाँ रकेर्ड बनेको थियो । त्यसपछि मङ्सिर १२ अर्ब ५४ करोड डलरमा झरेको विदेशी विनिमय सञ्चिति अहिले बढेर पहिलेको भन्दा पनि माथिल्लो उचाइमा पुगेको हो ।
गत आवको सोही अवधिमा विदेशी विनिमय सञ्चिति ९ अर्ब ६९ करोड डलर रहेको थियो । डलरका आधारमा विदेशी विनियम सञ्चिति ९ दशमलव ७ प्रतिशतले बढेको देखिन्छ ।
नेपाल राष्ट्र बैंकको देशको वर्तमान आर्थिक तथा वित्तीय स्थिति विषयक पुससम्मको प्रतिवेदनले यस्तो देखाएको हो । प्रतिवेदनअनुसार नेपाली मुद्रामा विदेशी विनियम सञ्चिति १४ खर्ब ९३ अर्ब ८४ करोड पुगेको छ । यसअघि गत कात्तिकमा यस्तो सञ्चिति १५ खर्ब ६ करोड रहेको थियो । तर, पुससम्म आउँदा डलरको मूल्य घटेपछि नेपाली रुपैयाँमा विदेशी विनिमय सञ्चिति कम देखिएको हो । आर्थिक अभियान दैनिकमा मिलन विश्वकर्माले समाचार लेखेका छन् ।
यो खबर पढेर तपाईलाई कस्तो महसुस भयो ?
प्रतिक्रिया