काठमाडौं । पश्चिमी वायुको प्रभाव पश्चिमबाट पूर्वमा सरेका आज पूर्व र मध्य क्षेत्रका केही स्थानमा पानी पर्ने संभावना रहेको छ ।
आज दिउँसो सुदूरपश्चिम र कर्णाली प्रदेशमा आंशिक बदली रही बाँकी प्रदेशमा आंशिक देखि सामान्य बदली रहनेछ । प्रदेश १ का धेरै स्थान तथा प्रदेश २, वाग्मती र गण्डकी प्रदेशका केही स्थानमा हल्का वर्षाको संभावना रहेको मौसम पूर्वानुमान महाशाखाले जनाएको छ । देशका उच्च पहाडी र हिमाली भू-भागका केही स्थानमा हल्का देखि मध्यम हिमपातको सम्भावना रहेको छ ।
यसैगरी आज राती प्रदेश १, प्रदेश २, वाग्मती र गण्डकी प्रदेशमा आंशिक देखि सामान्य बदली रही बाँकी स्थानहरुमा मौसम सामान्यतया सफा रहनेछ । महाशाखाकाअनुसार प्रदेश १, प्रदेश २ र वाग्मतीका केही स्थान तथा गण्डकी प्रदेशका एक/दुई स्थानमा हल्का वर्षाको संभावना छ । प्रदेश १, वाग्मती र गण्डकी प्रदेशका उच्च पहाडी र हिमाली भू-भागका केही स्थानमा हल्का हिमपातको सम्भावना रहेको छ ।
भोलिदेखि भने मौसममा क्रमिक सुधार हुने मौसमविदले बताएका छन् ।
