गरिब देशहरुमा खोप पठाउनेबारे के भन्छ डब्लुएचओ ?

काठमाडौं – एक वर्ष लामो कोरोना महामारीको कहरपछि अब यसविरुद्धको खोपको चर्चा भइरहेको छ ।

यसैबीच गरिब राष्ट्रहरूमा नयाँ बर्ष सन् २०२१ को सुरूदेखि नै कोरोनाविरूद्धको खोप पठाउन थालिने विश्व स्वास्थ्य संगठन (डब्लुएचओ) ले बताएको छ ।

शुक्रवार डब्लुएचओ र त्यसका साझेदारहरूले कोभ्याक्सलगायतका खोप शीघ्र उपलब्ध हुनसक्ने शुक्रबार बताएका हुन्।

उनीहरूले सबैलाई पुग्नेगरी बनाउने तयारी भइरहेको जनाएको अन्तर्राष्टिय सञ्चारमाध्यमले जनाएका छन् ।

विश्व समुदायका लागि झण्डै दुई अर्ब मात्रा खोप सुरक्षित गर्न लागिएको स्वास्थ्य निकायका अधिकारीहरूको भनाई छ ।

संगठनले जारी गरेको वक्तव्यमा लेखिएको छ, ”सबै देशले कोरोनाविरूद्धको खोप किनेर लैजान सक्दैनन्, ती देशहरूमा पनि सन् २०२१ को सुरू देखि नै खोप पठाइने छ।” अध्यारो सुरुङ्मा पनि थोरै उज्यालो हुन्छ भने झैँ महामारीका बेला पनि गरिब मुलुकलाई कोरोनाविरूद्धको खोप उपलब्ध गराउने प्रयास भइरहेको डब्लुएचओका प्रमुख टेड्रोस अधानोम गेब्रेयससले जानकारी दिए।