काठमाडौं । तारकेश्वर नगरपालिकाभित्र भोलिदेखि विद्यालयहरु खुल्ने भएका छन् । आज तारकेश्वर नगर प्याव्सन र एन प्याब्सनले गरेको पत्रकार सम्मेलनमा विद्यालय खोल्नका लागि स्वास्थ्यका सबै मापदण्डहरु पुरा गरिएको जानकारी दिइएको थियो । स्वास्थ्यका सबै मापदण्डहरु कायम गरिसकेको र अभिभावकहरुको सल्लाहमा नगर शिक्षा शाखाले विद्यालय सञ्चालन गर्न केही दिनअघि निर्देशन दिए पश्चात विद्यालयहरु खुल्ने भएका हुन् । नगर शिक्षा शाखाले कक्षा ८–९ र १० का कक्षाहरु सञ्चालन गर्दा दुई सिफ्टमा पढाउन विद्यालयहरुलाई निर्देशन दिइएको थियो । जसमा हप्ताको ३ दिन मात्र विद्यार्थीहरु भौतिक रूपमा उपस्थित भएर अध्ययन गर्न पाउनेछन् ।
आज तारकेश्वर नगर प्याव्सन र एन प्याव्सनले गरेको पत्रकार सम्मेलनमा नगर शिक्षा प्रमुख होमनाथ न्यौपाने, जनप्रतिनिधिहरु, शिक्षा विद् तथा बुद्धिजिवी र संस्थागत विद्यालयका प्रिन्सिपलहरुको सहभागिता रहेको थियो ।
विद्यालय सञ्चालन गर्ने तयारीबारे जानकारी गर्दै प्याव्सन तारकेश्वरका अध्यक्ष धनबहादुर पुनले नगर शिक्षाले तोकेका स्वास्थ्यका मापदण्ड र अन्तर्राष्ट्रिय रुपमा प्रचलनमा आएका मापदण्डहरूलाई संस्थागत विद्यालयहरुले पुरा गरेकाले भोलीदेखि विद्यालय सञ्चालन हुने बताए । विद्यालयको गेटबाट विद्यार्थी प्रवेश गर्दा अनिवार्य माक्स लगाउनुपर्ने, गेटमा ज्वरो नापेर मात्र प्रवेश गर्ने, गेट भित्र छिर्ने वित्तिकै अनिवार्य रूपमा सेनिटाइजर टनेल कक्षमा प्रवेश गरी स्प्रेबाट सेनिटाइज भइसकेपछि साबुन पानीले हात धोएर मात्र विद्यार्थी कक्षा कोठामा दूरी कायम गरेर प्रवेश गर्नेछन् ।
बेन्चमा बस्दा एउटा बेन्चमा बढिमा दुईजना मात्र बस्न सक्ने व्यवस्था गरिएको छ । खाजा अनिवार्य घरबाटै लैजानुपर्नेछ । विद्यालयको क्यान्टीन खोलिने छैन । कक्षाकोठाहरुमा तातो पानीको व्यवस्था हुनेछ । विद्यार्थीहरु घरजाँदा पनि गेटमा ज्वरो नापेरमात्र घर पठाइनेछ ।
विद्यालयमा हेल्प डेस्कको व्यवस्था गरिने छ । विद्यार्थीहरुको स्वास्थ्यमा समस्या देखिएमा तत्कालै नजिकैको स्वास्थ्य संस्थामा विद्यालयले स्वास्थ्य परिक्षण गराउन लैजानेछ । विद्यालयका कक्षा कोठाहरु दैनिक सरसफाई र निर्मलीकरण गरिने तयारी गरेको प्याव्सनका अध्यक्ष धनबहादुर पुनले बताए। पुनकाअनुसार दैनिक ५ मिनेट कोभिड संक्रमणबारे विद्यार्थीहरुलाई जानकारी दिइनेछ । विद्यालयहरुले १ सिफ्टमा ४ घण्टा मात्र विद्यालय सञ्चालन गर्नेछन् । सिफ्ट सञ्चालन गर्दा ठूला कक्षाहरुलाई बिहानीको सत्र र सानालाई दिउँसोको सत्रमा राखिनेछ ।
कार्यक्रममा बोल्दै जनप्रतिनिधिहरुले विद्यालय सञ्चालन गर्नका लागि आवश्यक सहयोग र स्वास्थ्यका मापदण्ड पुरा गराउन सकेको सहयोग गर्ने प्रतिबद्धता जनाएका छन् । विद्यार्थीहरुमा संक्रमण देखिएको खण्डमा स्वास्थ्य उपचारका लागि पहलकदमी गर्ने बताएका छन् । विद्यालयहरुलाई स्वास्थ्य मापदण्ड पूर्ण रुपमा कार्यान्वयन गर्न निर्देशन समेत दिएका छन् । त्यस्तै शिक्षा विद् तथा बुद्धिजिवी प्रा.डा. प्रदिपचन्द्र गौतमले विद्यालय खोल्नु स्वागतयोग्य भएको बताएका छन् तर विद्यार्थीहरुको स्वास्थ्यमा हेलचक्राई नगरी विद्यालय जिम्मेवार बन्न आग्रह गरे ।
त्यस्तै प्यावश्न तारकेश्वरका सल्लाहकार लोकेन्द्रबहादुर खड्काले अभिभावकहरुले विद्यालय खोल्न दबाब दिन थालिसकेको र शैक्षिक सत्रको अन्तिम समय आउन लागिसकेकाले स्वास्थ्य मापदण्ड अपनाएर कोरोना संक्रमण फैलिन नदिई विद्यालय सञ्चालन गर्न तारकेश्वरभित्रका संस्थागत विद्यालयहरु तयारी अवस्थामा रहेको बताएका छन् ।
एन प्यावसन तारकेश्वरका अध्यक्ष गोविन्द भट्टले विद्यार्थीको स्वास्थ्यलाई मध्यनजर गर्दै कक्षा ८ भन्दा माथिका कक्षामात्र सुरु गर्न लागेको बताएका छन् । संक्रमण नबढेमा अभिभावकहरुसँग सल्लाह गरेर तल्ला कक्षाहरु विस्तारै खोल्दै जाने बताएका छन् ।
यो खबर पढेर तपाईलाई कस्तो महसुस भयो ?
प्रतिक्रिया