उपराष्ट्रपतिको निर्वाचन आगामि चैत ९ गते,  ३ गते उम्मेदवारी दर्ता

काठमाडौं, ३० फागुन । उपराष्ट्रपतिको निर्वाचन आगामि चैत ९ गते हुने भएको छ । राष्ट्रपति निर्वाचन सकिएलगत्तै निर्वाचन आयोगले बुधबार उपराष्ट्रपति निर्वाचनका लागि मिति तय गरेको हो ।उपराष्ट्रपति निर्वाचनका लागि चैत ३ गते उम्मेदवारी दर्ताको मिति तोकिएको छ । चैत १ गते मतदाता नामावली प्रकाशन गरिनेछ भने चैत ३ गते उम्मेदवारी दर्ता तथा ४ गते उम्मेदवारको अन्तिम नामावली प्रकाशन गर्ने आयोगको कार्यक्रम छ ।चैत ९ गते शुक्रबार विहान १० वजेदेखि अपरान्ह ३ बजेसम्म अन्तर्राष्ट्रिय सम्मेलन केन्द्र नयाँ बानेश्वरमा मतदान हुनेछ ।संविधानअनुसार राष्ट्रपति र उपराष्ट्रपति फरक लिङ्ग वा समुदायको हुनुपर्छ ।राष्ट्रपतिमा खस आर्य समुदायका महिला विद्यादेवी भण्डारी निर्वाचित भएकाले उपराष्ट्रपति त्यस बाहेकका लिङ्ग वा समुदायको व्यक्ति मात्र उपराष्ट्रपतिको उम्मेदवार बन्न पाउने व्यवस्था छ ।