सोह्र श्राद्ध गर्न भिडियोको प्रयोग

दमौली । देवघाट गाउँपालिकाका प्रमुख प्रशासकीय अधिकृत रमेश सुवेदीले सोह्र श्राद्ध गर्न भिडियोको प्रयोग गरेका छन् । कोभिड–१९ को संक्रमण दिनप्रतिदिन बढ्दै गएपछि उनले भिडियोबाटै सोह्र श्राद्ध गरेका हुन् ।

पण्डितलाई घरमै बोलाएर श्राद्ध गर्न कोरोनाको जोखिम भएकाले भिडियो प्रविधिको प्रयोग गरी श्राद्ध सम्पन्न गरेको सुवेदीले जानकारी दिए । उनले भरतपुर महानगरपालिका–११ चितवनमा पितृको श्राद्ध गरेका हुन् । यसअघि हरेक वर्ष पण्डितलाई घरमै बोलाएर श्राद्ध गर्दै आएका सुवेदीले घरमै बोलाएर श्राद्ध गर्नु भन्दा भिडियोको माध्यमबाट झन् सजिलो भएको बताए । “अहिले पण्डितलाई घरमै बोलाउने अवस्था पनि रहेन, प्रविधिको प्रयोग गरेर श्राद्ध गर्ने काम गरेँ”, उनले भने, “यसले गर्दा समय पनि चाँडै सकिने र अन्य झन्झट पनि नहुने ।”

उनका अनुसार भिडियो हेर्दा पण्डित छेउमै बसेको अनुभव भएको छ । भिडियो सन्देशमा पण्डितको निर्देशन अनुसारको सबै विधि पुर्याएर श्राद्ध गर्न सहज भएको सुवेदीले बताए। आफ्ना अन्य दाजुभाई काठमाडौंमा रहेकामा उनीहरु पनि सोही भिडियोमा जोडिएर श्राद्धको कार्य पूरा गरेको उनले जानकारी दिए ।

“प्रविधिको उच्चतम प्रयोगले पितृ कार्य सहज भएको र कोरोनाको कुनै पनि जोखिम भएन”, उनले भने, “सोह्र श्राद्धको अवधिमा पण्डितहरु कम्तीमा पनि चार÷पाँच घरमा पुगेका हुन्छन् । यसले गर्दा दुवै पक्षलाई जोखिम हुने हुँदा अहिलेको अवस्थामा भिडियोको प्रयोग नै उपयुक्त लाग्यो ।”

कुशको टुक्रालाई पण्डित मानेर आफ्नै अगाडि राखेर त्यसलाई टीका लगाएर दक्षिणास्वरुप केही पैसा चढाउन सकिने प्रशासकीय अधिकृत सुवेदीले बताए । पण्डितलाई पछि भेटघाटको क्रममा अथवा अन्य केही माध्यमबाट दक्षिणा दिन सकिने उनले जानकारी दिए । कोभिड–१९ का कारण हरेक क्षेत्र प्रभावित भएझै हिन्दूहरुको वार्षिक पितृ अर्पण कार्य सोह्र श्राद्ध पनि प्रभावित भएको छ । रासस