काठमाडौं । पूर्वमन्त्री एवम् नेपाली कांग्रेसका केन्द्रीय सदस्य अर्जुननरसिंह केसीले कोरोना संक्रमण समुदायस्तरमा फैलिने सम्भावना बढेको बताएका छन् ।
सरकारले पूर्व तयारीको वेवास्ता, स्वास्थ्य सामाग्री खरिदमा ढिलासुस्ती, भ्रष्ट्राचार र नेकपाभित्रको सत्ता संघर्षका कारण देश गम्भीर मोडतिर धकेलिँदै गएको बताएका छन् ।
पूर्व स्वास्थ्यमन्त्री समेत रहेका केसीले पीसीआर परीक्षण, क्वारेन्टाइनको व्यवस्थापन र सीमानामा कडाईका साथ लागेको भए परिस्थिती सहज हुनसक्ने तर अहिले परिस्थिती काबु भन्दा बाहिर जाने स्थिती आएको समेत संकेत गरेका छन् । उनले भने, “पीसीआर जाँच, निगरानी तथा कन्ट्याक्ट ट्रेसिङ्ममा व्यापकता क्वारेन्टाइनको वैज्ञानिक व्यवस्थापन र सीमाना बन्दलाई कडाईका साथ पालना गर्नसकेको भए समस्या काबुभित्रै रहने थियो, तर अब काबुबाहिर जाने खतरा बढिसकेको छ ।”
बर्तमान परिस्थिती र सरकारको बारेमा नेता केसी लेख्छन् :
पूर्वतयारीमा पूर्ण बेवास्ता,स्वास्थ्य सामाग्री खरिदमा भएको ढिला सुस्ती र भ्रष्टाचार, राज्यको प्रमुख एजेन्डा हुनुपर्ने कोभिड १९ नेकपा सत्ता संघर्सले गम्भीर विषय सूचीमै नपर्नु र स्वास्थ्य संस्थाहरुलाई युद्धस्तरमा तयारी अवस्थामा राख्ने काममा धिंग्न्याइले देस गम्भीर संकट तिर धकेलिँदै छ। महामारीले जनसमुदायमा फैलिएर विकराल रुप लिने सम्भावना देखिईसक्यो । पीसीआर जाँच, निगरानी तथा कन्ट्याक्ट ट्रेसिङ्ममा व्यापकताक्वारेन्टाइनको वैज्ञानिक व्यवस्थापन र सीमाना बन्दलाई कडाईका साथ पालना गर्नसकेको भए समस्या काबुभित्रै रहने थियो, तर अब काबुबाहिर जाने खतरा बढिसकेको छ । सीमानामा खटाईएका सुरक्षाकर्मीलाई महामारीको जोखिम भत्ता, व्यवस्थित क्याम्प, आधारभूत सुविधा जुटाईदिने कर्तब्य सम्म पनि सरकारले पूरा गर्न सकेको छैन। सीमानाबाट जथाभावी प्रवेश गर्ने समुदायका कारण संक्रमण बढेको सरकारी भनाइछ । सीमानामा खटिएका सुरक्षाकर्मीहरू पिउने पानी पनि नपाई गर्मी, झरी र डुबानका बीच खटिरहेको अवस्था छ।अर्कातिर सरकारी तहमा भईरहेको भ्रष्टाचार, हिनामिना, चरम लापरवाही र बेवास्ता छदैछ, त्यसमाथि सत्तारुढ पार्टी नेकपाभित्र अहोरात्रको सत्ता–किचलो उत्तिकै दोषी छ।
यो किचलोमा जनताको दुःख सुखको प्रतिनिधि संसदलाई बाधक मानेर मध्यअसारमै संसदको वर्षे अधिवेशन बन्द गरियो । राज्यको जिम्मेवारी बोकेको पार्टीका शीर्ष नेताहरूबीच घन्टौं लामा छलफल हुन्छन्, तर त्यहाँ कोरोना महामारी, बाढी–पहिरो तथा डुबानबाट पीडित सर्वसाधारण, श्रमिक, निश्चित आय भएका वर्ग, स्वास्थ्यकर्मी तथा सुरक्षाकर्मीलाई सुविधा दिएर दक्षता र प्रतिफल बढाउने एजेन्डाले कहिल्यै प्रवेश हुन पाएन । रोगको डर सँगै भोकै मर्नु पर्ने आमजनतालाई नारकीय पीडा दिईरहेका यस्ता समस्याहरूमा कम्युनिस्ट नेतृत्वको सरकार न्यूनतम संवेदनशील पनि नहुनु वर्तमान संकटको मूख्य कारण भएको छ । देशको लागि योभन्दा दुःखद र दुर्दशा अरु के हुनसक्छ ? त्यो पनि समृद्धि, स्थिरता र बिकास को स्वर्णिम स्वप्नको आशा बाँडेर आउने कम्युनिस्ट क्रान्तिकारी सरकार बाट ?
भयो,अतिभयो अब सम्पूर्ण राज्य शक्ति , दलहरु,नागरिक समाज र हरेक व्यक्ति यो महा संकट र चुनौतीको सामना गर्ने वातावरण निर्मणमा सरकार इमान्दार बन !
यो खबर पढेर तपाईलाई कस्तो महसुस भयो ?
प्रतिक्रिया