कोरोनाको रोकथाममा भएको खर्च के मा कति ? सुदूरपश्चिम सरकारको विवरण यस्तो

काठमाडौं – सुदूरपश्चिम प्रदेश सरकारले ‘कोभिड–१९’ को रोकथाम, उपचार, व्यवस्थापन लगायतका काममा कूल ५७ करोड ४८ लाख खर्च भएको जनाएको छ ।

सुदूरपश्चिम प्रदेश सरकारका प्रवक्ता एवम् आन्तरिक मामिला तथा कानूनमन्त्री प्रकाशबहादुर शाहले कोरोना भाइरसको रोकथाम उपचार र व्यवस्थापनका लागि खडा गरिएको कोषबाट रु ४२ करोड ४८ लाख र प्रदेश सरकारको थप १५ करोड रुपैयाँ  कोभिड–१९ को उपचार रोकथाम र व्यवस्थापनका लागि खर्च भएको जानकारी दिए ।

कोभिड–१९ को शुरुको चरणमा प्रदेशका स्थानीय तह धनगढी उपमहानगरपालिकालाई रु पाँच लाख

३३ नगरपालिकालाई रु चार लाख

५४ गाउँपालिकालाई तीन लाख रुपैयाँका दरले रकम उपलब्ध गराइएको

दोस्रो चरणमा राहत वितरण गर्न रु १५ करोड २६ लाख

तेस्रो चरणमा केही दिनअघि मात्र क्वारेन्टिन र आइसोलेशनको व्यवस्थापन गर्नका लागि ६ करोड बजेट उपलब्ध गराइएको

प्रदेशको नेपाल प्रहरी, सशस्त्र प्रहरी बल, नेपाली सेना, जिल्ला प्रशासन र राष्ट्रिय अनुसन्धानलाई समेत गरी रु एक करोड ५० लाख रकम उपलब्ध गराइएको

भेन्टिलेटर र अन्य अत्यावश्यक स्वास्थ्य सामग्री खरिदलगायतका काममा रु २० करोड खर्च भएको

आगामी कार्यक्रम के छन् ? 

प्रदेश सरकारले आगामी आर्थिक वर्षको बजेटमा कृषिमा आत्मनिर्भर बनाउन ल्याएको ‘नमुना गाउँ आफै बनाऔँ, रोगबाट बचाऔँ भोकबाट जोगाऔँ, मुख्यमन्त्री कृषि एकीकृत बस्ती विकास कार्यक्रम, प्रभावकारी स्वास्थ्य सेवाका लागि स्वास्थ्य स्वयंसेवक कार्यक्रम, मुख्यमन्त्री ज्येष्ठ नागरिक स्वास्थ्य कार्यक्रम, प्रदेशका गाउँ उज्यालो बनाऔँ र कूप्रथा हटाउन एउटै ‘सृष्टि समृद्धि’ जस्ता कार्यक्रम कार्यान्वयनमा जोड दिएको जनाएको छ ।