यो धर्तीमा जब युवकले जीत केही ल्याउँदैनन्
यो बाटोमा जब युवतीले गीत केही गाउँदैनन्
डाकी कोइली अनि वनवनै बोल्न छाड्ला बसन्त
निभ्लान् तारा, ग्रहहरु त्यहीँ सृष्टिको हुन्छ अन्त ।
कवि शिरोमणी लेखनाथ पौड्यालले युवाको चर्चा गर्दै कोरेको कविताको यो श्लोकले युवासँग एउटा राष्ट्रको अस्तित्व कसरी जोडिएको हुन्छ भनेर प्रष्ट्याउँछ ।
हुन पनि युवा राष्ट्रका आत्मा हुन् । देशका शक्ति हुन् । युवाले चाहेमा ठूल्ठूला काम पनि सहजै पूरा हुन्छन् । युवाले चाहेमा देशमा क्रान्ति र शान्ति दुवै सम्भव छ ।
समृद्ध मुलुकको समृद्धिका मूल तत्व हुन् युवा । तर, तिनै युवाले देशमा फक्रिने उर्वर जमिन पाएनन् भने के अस्तित्व रहला यो माटोको ? नेपालका युवाहरुको नियति त्यस्तै छ । अवसरको खोजीमा हरेक दिन युवा विदेश पलायन भइरहेका छन् ।
यद्यपि, तिनै युवामध्ये यस्ता केही युवा छन् जसले आफ्नै मातृभूमिमा अवसर फूलाएका छन् । जो विदेशको डलर त्यागेर आफ्नै देशमा आम्दानीको बाटो बनाइरहेका छन् ।
त्यस्तै केही युवाहरुको कथा समेट्दै हामीले ह्यासट्याग स्माइलका केही अंकहरु तयार पारेका छौं । नछुटाइ पढ्नुहोला र हेर्नुहोला ।
कृष्णराज तिमल्सिना
रामेछापको एउटा सानो गाउँको सामान्य परिवारमा जन्मिएका कृष्णराजका सपनाहरु पनि सामान्य थिए । सानो छँदा उनका गोडा राम्रा चप्पल लगाउन चाहन्थे ।
उमेर सँगै सपना पनि हुर्कियो । कृष्णराजलाई शहरमै घर होस् भन्ने लाग्नथाल्यो । त्यही सपना साकार गर्न शहर पसेका उनी केही वर्ष विदेश पनि बसे । देशमा आफ्नै व्यवसाय शुरु गर्नलाई पैसा जो कमाउनु थियो । हातमा केही रकम र मनभरि व्यवसायी बन्ने हौसला बोकेर स्वदेश फर्किए कृष्णराज ।
सानो कपडा पसलबाट शुरु भएको उनको उद्यमशीलताको यात्रा अहिले एउटा गार्मेन्ट कम्पनीमा परिणत भएको छ ।
नेपालीकै हातबाट नेपालीले लाउने कपडा नेपालमै उत्पादन गर्ने उद्देश्यले ३२ वर्षीया कृष्णराज तिमिल्सिनाले ‘थ्रेड गार्मेन्ट’ स्थापना गरेका छन् । बजारमा प्रचलित लिमिटेड एडिसन, थ्रेड, केटि जिन्स, सिएम, अर्बन आउटफिटर, लेजेन्ड जेन्टलम्यान जस्ता ब्राण्डका कपडा यही कम्पनीमा उत्पादन हुन्छन् ।
साढे ५ रोपनी जमिनमा फैलिएको यस गार्मेन्ट कम्पनीमा पस्नासाथ छुट्टै वातावरणमा पुगेको अनुभव हुन्छ । लस्करै कपडा सिउने मेसिन राखिएको छ । ३ सय भन्दा बढी कामदार धमाधम काम गरिरहेका हुन्छन् ।
तर, कृष्णराज अझै थाकेका छैनन् । उनलाई यतिले अझै पुगेकै छैन । हो, अहिले कृष्णसँग लगाउनलाई राम्रा चप्पल, जुत्ता छन्, काठमाडौंमै घर पनि बनाइसकेका छन् उनले । यसो हेर्दा उनले देखेका सपनाहरु लगभग पूरा भएजस्तो लाग्छ ।
यद्यपि, उनलाई अबका दिनमा कपडा उत्पादन मात्र होइन ती कपडा बनाउने कच्चा पदार्थ पनि देशमै उपलब्ध होस् भन्ने चाहना छ । नेपाललाई कपडामा ‘आत्मनिर्भर’ बनाउने अभियानमा लागिपरेका छन् कृष्णराज ।
अफरिङ ह्यापिनेस
४ जना युवाहरुको एक समूहले आफ्नै देशमा उद्यम गर्ने योजनाले स्थापना गरेका हुन् ‘अफरिङ ह्यापिनेस’ । यसको अर्थ हो ‘खुसी बाँड्दै’ । कुनै विशेष अवसरमा वा आफ्नो परिवार, साथीभाइ, प्रेमीप्रेमिका, श्रीमानश्रीमती लगायत विशेष मान्छेलाई माया दर्साउन सरप्राइज उपहार दिनुप¥यो वा त्यस्तो ‘मुमेन्ट’ सिर्जना गरिदिनुप-यो भने ‘अफरिङ ह्यापिनेस’को सहायता लिँदा हुन्छ ।
उपहार मात्र नभएर आजकल उनीहरु अनुभुति पनि बाँड्छन् । कुनै ‘थिम’मा रहेर होस् या आफ्ना उपभोक्ताको चाहनालाई बुझेर होस् ‘अफरिङ ह्यापिनेस’ले कैयौंलाई सरप्राइज दिइसकेको छ । दुई मनलाई जोड्ने तार बनिदिएको छ ।
बर्थ डे होस् या एनिभर्सरी, आमालाई माया व्यक्त गर्न होस् या रिसाएकी मायालुलाई फकाउन अफरिङ ह्यापिनेससँग टन्नै तरिकाहरु छन् । यहाँ बट्टामा माया बाँडिन्छ । मुस्कानका साना साना टुक्रालाई सँगालेर फ्रेमिङ गरिन्छ । सात समुद्र पार भएका मनहरुलाई एउटै धागोले बाँधिन्छ । यहाँ खुसी फूलाइन्छ ।
केही थान ‘क्रिएटिभ माइन्ड’ ले आफ्नै देशमा नौलो प्रयोग गरेर प्रमाणित गरेका छन् कि सफल व्यक्तिले भिन्न काम गर्दैनन् बरु एउटै कामलाई भिन्न तरिकाले गर्छन् ।
अमर क्षेत्री
अमर क्षेत्री तिनै युवाका एक प्रतिनिधि हुन् जो आफ्नै देशमा परिश्रमको पसिना बगाउने उद्देश्यले लागिपरेका छन् । ४ वर्ष चीनको होटल व्यवसायमा काम गरेपछि अमरलाई आफ्नो परिश्रम अर्काको राष्ट्रलाई विकास गर्नमा खेर गइरहेको अनुभव भयो । त्यस लगत्तै आफ्नै देशमा उद्यमशीलता पोखाउने सपना बोकेर नेपाल फर्किए उनी । र, आउनासाथ यहाँको बजार र मागको अध्ययनमा लागिहाले ।
अहिलेका युवाहरु आफ्नो फिटनेस र हेल्थमा निकै सचेत भएको पाएपछि आफ्नो मिहिनेत र पुँजीलाई फिटनेस बिज्नेसमा लगाउने निर्णय गरे अमरले ।
२८ वर्षीय अमरले आफ्नै भिनाजु र चिनजानमै रहेका दाजुसँगको सहकार्यमा ‘डि जिम’ स्थापना गरे । जिम स्थापना भएको धेरै भएको छैन । तर, छोटो समयमै सो व्यवसायले निकै राम्रो सफलता हात पारेको छ । स्थापना भएको १ महिनामै २ सय ५० भन्दा बढी ग्राहकले यहाँबाट सेवा लिइरहेका छन् । बिहान ५ बजेदेखि राति ९ बजेसम्म अमर र उनका ‘बिज्नेस पार्टनर’लाई भ्याइनभ्याइ हुन्छ ।
‘नेपाल अविकसित मुलुक हो । यहाँ कमाइ हुँदैन । लगानी गर्ने वातावरण नै छैन । बजार छैन ।’ जस्ता भनाइहरुले हाम्रा नजरलाई धुमिल बनाएको र अफवाहहरुको भरमा हामीले नेपालमा रहेका सम्भावनाहरुलाई नजरअन्दाज गरिरहेको बताउँछन् अमर । उनका अनुसार यो समय नेपालको लागि एकदमै ‘उत्पादनशील’ छ र यहाँ बिज्नेसका नयाँ अवधारणाहरुले राम्रो नतिजा हात पार्न सक्छन् ।
ऋण लागेपनि दिन नलागोस् भन्ने अमर आफूले ऋण लिएरै व्यवसाय शुरु गरेतापनि सबैजनाबाट राम्रो प्रतिक्रिया पाइरहेकाले व्यवसाय आगामी दिनमा फस्टाउँदै जाने कुरामा ढुक्क छन् ।
श्याम पाण्डे
श्याम पाण्डे २८ वर्षका भए । उनी इमाडोलमा ठेलामा सब्जी व्यापार गर्छन् । केही हजार पैसाका लागि विदेश पलायन भइरहेका युवाहरुका निमित्त उनी उदाहरणीय पात्र हुन् जसले विदेशको लाखौं कमाइ छोडेर आफ्नै देशको माटो रोजे ।
विदेशको ‘लाख’भन्दा आफ्नै देशको ‘सय’ मा रमाउँछु भन्दै नेपाल फर्किएका उनले अहिले दिनमा नभएको पनि ३(४ हजारसम्म बचाउँछन् । भन्छन्, ‘कुनै इलम सानोठूलो हुँदैन, मिहिनेत गरे सबैतिर फाइदैफाइदा छ’। पौरखले कमाएको उनको खुसी ह्यासट्याग स्माइलको यस अंकमा पस्किएका छौं ।
यी पौरखी युवाहरुको उद्यमशीलताको कथा हेर्न भिडियो लिंक क्लिक गर्नुहोस् :
यो खबर पढेर तपाईलाई कस्तो महसुस भयो ?
प्रतिक्रिया