१३ माघ २०७६, सोमबार २१:३६

प्रदेश नं १ को प्रदेशसभा बैठक माघ २३ गतेदेखि


प्रकाशित मिति : १३ माघ २०७६, सोमबार २१:३६

प्रदेश नं १ को प्रदेशसभाको आगामी पाँचौँ अधिवेशन यही माघ २३ गते शुरु हुने भएको छ । प्रदेश नं १ को मुख्यमन्त्रीको कार्यालय तथा मन्त्रिपरिषद्को आज बसेको बैठकले आगामी हिउँदे अधिवेशन यही माघ २३ बोलाउनका लागि प्रदेश प्रमुखसमक्ष सिफारिश गर्ने निर्णय गरिएको आर्थिक मामिला तथा योजनामन्त्री ईन्द्रबहादुर आङ्बोले जानकारी दिनुभयो

यसैगरी बैठकले प्रदेश लगानी बोर्डको कार्यकारी निर्देशकमा डा सरोज कोइरालालाई नियुक्त गर्ने निर्णय गरेको छ । यस्तै मुख्यमन्त्रीको आर्थिक सल्लाहकारमा डा महेन्द्रबहादुर गुरुङ, जनसम्पर्क सल्लाहकारमा रामकुमार बस्नेत र सूचना प्रविधि सल्लाहकारमा किशोर सुवेदीलाई नियुक्त गर्ने निर्णय गरिएको छ ।

बैठकले प्रादेशिक औद्योगिक व्यवसायसम्बन्धी विधेयक २०७६, प्रदेश वन विधेयक २०७६, प्रदेश वातावरण संरक्षण सम्बन्धमा व्यवस्था गर्न बनेको विधेयक २०७६, प्रदेश जनस्वास्थ्य सम्बन्धमा व्यवस्था गर्न बनेको विधेयक २०७६ र प्रदेश बालबालिका अधिकार सम्बन्धमा व्यवस्था गर्न विधेयक २०७६ प्रदेशसभामा पेस गर्ने निर्णय गरेको छ ।

यस्तै बैठकले सुर्तिजन्य पदार्थ नियमन र नियन्त्रणयुक्त प्रदेश बनाउने मुख्यमन्त्री तथा मन्त्रिपरिषद् कार्यालयलगायत सातै वटा मन्त्रालयको एक सय मिटर वरिपरि निषेध गर्नुका साथै प्रदेशभरि नियमन, नियन्त्रण तथा निषेध गर्नेलगायतका २४ वटा निर्णय भएको मन्त्री आङबोले जानकारी दिनुभयो ।

प्रतिक्रिया दिनुहोस