२१ मंसिर २०७६, शनिबार १०:२५

उदाहरणीय युवा अमर क्षेत्रीको कथा : विदेशमा सिकेर नेपाललाई सिकाउँदै

‘हुन्न, छैन, सकिँदैन’ भनेर विदेश पलायन हुनेहरुले पढ्नैपर्ने कथा


प्रकाशित मिति : २१ मंसिर २०७६, शनिबार १०:२५

यो धर्तीमा जब युवकले जीत केही ल्याउँदैनन्
यो बाटोमा जब युवतीले गीत केही गाउँदैनन्
डाकी कोइली अनि वनवनै बोल्न छाड्ला बसन्त
निभ्लान् तारा, ग्रहहरु त्यहीँ सृष्टिको हुन्छ अन्त ।

कवि शिरोमणी लेखनाथ पौड्यालले युवाको चर्चा गर्दै कोरेको कविताको यो श्लोकले युवासँग एउटा राष्ट्रको अस्तित्व कसरी जोडिएको हुन्छ भनेर प्रष्ट्याउँछ । हुन पनि युवा राष्ट्रका आत्मा हुन् । देशका शक्ति हुन् । युवाले चाहेमा ठूल्ठूला काम पनि सहजै पूरा हुन्छन् ।

अमर क्षेत्री पनि तिनै युवाका एक प्रतिनिधि हुन् जो आफ्नै देशमा परिश्रमको पसिना बगाउने उद्देश्यले लागिपरेका छन् । ४ वर्ष चीनको होटल व्यवसायमा काम गरेपछि अमरलाई आफ्नो परिश्रम अर्काको राष्ट्रलाई विकास गर्नमा खेर गइरहेको अनुभव भयो । त्यस लगत्तै आफ्नै देशमा उद्यमशीलता पोखाउने सपना बोकेर नेपाल फर्किए उनी । र, आउनासाथ यहाँको बजार र मागको अध्ययनमा लागिहाले ।

अहिलेका युवाहरु आफ्नो फिटनेस र हेल्थमा निकै सचेत भएको पाएपछि आफ्नो मिहिनेत र पुँजीलाई फिटनेस बिज्नेसमा लगाउने निर्णय गरे अमरले ।

२८ वर्षीय अमरले आफ्नै भिनाजु र चिनजानमै रहेका दाजुसँगको सहकार्यमा ‘डि जिम’ स्थापना गरे । जिम स्थापना भएको धेरै भएको छैन । तर, छोटो समयमै सो व्यवसायले निकै राम्रो सफलता हात पारेको छ । स्थापना भएको १ महिनामै २ सय ५० भन्दा बढी ग्राहकले यहाँबाट सेवा लिइरहेका छन् । बिहान ५ बजेदेखि राति ९ बजेसम्म अमर र उनका बिज्नेस पार्टनरलाई भ्याइनभ्याइ हुन्छ ।

‘नेपाल अविकसित मुलुक हो । यहाँ कमाइ हुँदैन । लगानी गर्ने वातावरण नै छैन । मार्केट छैन ।’ जस्ता भनाइहरुले हाम्रा नजरलाई धुमिल बनाएको र अफवाहहरुको भरमा हामीले नेपालमा रहेका सम्भावनाहरुलाई नजरअन्दाज गरिरहेको बताउँछन् अमर । उनका अनुसार यो समय नेपालको लागि एकदमै ‘प्रोडक्टिभ’ छ र यहाँ बिज्नेसका नयाँ कन्सेप्ट र आइडियाहरुले राम्रो नतिजा हात पार्न सक्छन् ।

ऋण लागेपनि दिन नलागोस् भन्ने अमर ऋण लिएरै व्यवसाय शुरु गरेतापनि सबैजनाबाट राम्रो प्रतिक्रिया पाइरहेकाले व्यवसाय आगामी दिनमा फस्टाउँदै जाने कुरामा ढुक्क छन् ।

विगत १० वर्षको तथ्याङ्क हेर्ने हो भने वार्षिक रुपमा करिब ४ लाख युवाहरु वैदेशिक रोजगारीका निमित्त विदेशिरहेका छन् । त्यस्तै पढाइका सिलसिलामा आर्थिक वर्ष २०७४/७५ मा मत्रै ५८ हजार ७ सय ५८ विद्यार्थी विदेशिएका छन् । विदेश पलायन भइरहेको जनशक्तिलाई सरकारले कम्तीमा आफ्नो देशमा भएको सम्भावना चिनाउन मात्र सके पनि समृद्धि खोज्न भौतारिरहनु पर्ने थिएन ।

अमरको पौरखी कथा हेर्न भिडियो लिंक क्लिक गर्नुहोस् :

प्रतिक्रिया दिनुहोस