काठमाडौं । ग्लोबल आइएमई क्यापिटलले १ अर्ब रुपैयाँको खुलामुखी म्युचुअल फन्ड सञ्चालनमा ल्याउने तयारी गरेको छ ।
क्यापिटलले ‘ग्लोबल सिस्टमेटिक इन्भेस्टमेन्ट प्रोडक्ट’ नामको योजना सञ्चालन गर्न नेपाल धितोपत्र बोर्ड (सेबोन) मा अनुमति माग्दै निवेदन दिएको छ ।
सेबोनबाट अनुमति पाएपछि क्यापिटलले ग्लोबल म्युचुअल फन्डअन्तर्गत यो योजना सञ्चालन गर्नेछ । योजनाअन्तर्गत १० रुपैयाँ अंकित मूल्यका १० करोड इकाइ निष्कासन गर्ने प्रस्ताव गरिएको छ। यसबाट योजनाको सुरुवाती आकार १ अर्ब रुपैयाँ हुनेछ ।
यो खुलामुखी म्युचुअल फन्ड भएकाले लगानीकर्ताले योजनाको नियमअनुसार आवश्यकताअनुसार इकाइ किन्न र बेच्न सक्नेछन् ।
योजनाको प्रवर्द्धक ग्लोबल आइएमई बैंक रहेको छ भने योजना व्यवस्थापनको जिम्मेवारी ग्लोबल आइएमई क्यापिटलले सम्हाल्नेछ ।
सेबोनबाट अनुमति पाएपछि क्यापिटलले इकाइ बिक्रीको प्रक्रिया अघि बढाउनेछ । बिक्रीबाट संकलन भएको रकम विभिन्न लगानीका क्षेत्रमा परिचालन गरिनेछ ।
म्युचुअल फन्डमा थोरै रकमबाट पनि लगानी गर्न सकिने भएकाले यो योजनाबाट व्यक्तिगत लगानीकर्ताले पनि पुँजी बजारमा लगानी गर्ने अवसर पाउने अपेक्षा गरिएको छ ।
नेपालमा अहिले विभिन्न कम्पनीले बन्दमुखी र खुलामुखी म्युचुअल फन्ड सञ्चालन गरिरहेका छन् । ग्लोबल आइएमई क्यापिटलले पनि नयाँ खुलामुखी योजनामार्फत लगानीकर्तालाई व्यवस्थित रूपमा लगानी गर्ने अवसर दिन लागेको हो ।
यो खबर पढेर तपाईलाई कस्तो महसुस भयो ?
प्रतिक्रिया