इजरायलद्वारा दक्षिणी लेबनानमा हवाई आक्रमण, १९ जनाको मृत्यु

काठमाडौं । इजरायलले दक्षिणी लेबनानमा गरेको हवाई आक्रमणमा कम्तीमा १९ जनाको मृत्यु भएको छ ।

लेबनानको स्वास्थ्य मन्त्रालयका अनुसार डेइर कानौन शहरमा भएको आक्रमणमा तीन बालबालिका र तीन महिलासहित १० जनाको ज्यान गएको हो ।

साथै नाबाटिएह र टायर जिल्लामा भएका अन्य आक्रमणमा थप नौ जनाको मृत्यु भएको छ भने २९ जना घाइते भएका छन् ।

यो घटना अमेरिका मध्यस्थतामा इजरायल र लेबनानबीच ४५ दिनका लागि युद्धविराम थप गर्ने सहमति भएको एक साताभित्रै भएको हो । युद्धविराम भए पनि दक्षिणी लेबनान क्षेत्रमा इजरायल र हिजबुल्लाहबीच बेला–बेलामा गोली हानाहान भइरहेको छ ।

इजरायलले आफ्नो आक्रमण हिजबुल्लाहलाई लक्षित गरेको दाबी गर्दै आएको छ । तर आक्रमणमा महिला, बालबालिकासहित सर्वसाधारण पनि प्रभावित भइरहेका छन् ।