इरानलाई आणविक सम्झौता स्वीकार गर्न ट्रम्पको चेतावनी

काठमाडौं । अमेरिकी राष्ट्रपति डोनाल्ड ट्रम्पले इरानलाई आफ्नो आणविक कार्यक्रममाथि कडा नियन्त्रण स्वीकार गर्न र छिट्टै ‘स्मार्ट’ निर्णय लिन चेतावनी दिएका छन् ।

अमेरिकाले इरानमाथि नौसैनिक नाकाबन्दी कडा पारेपछि इरानको अर्थतन्त्र ठूलो दबाबमा परेको बताइएको छ । यसैबीच, ट्रम्पले इरानले अघि सारेको शान्ति प्रस्ताव अस्वीकार गर्ने संकेत पनि दिएका छन् ।

इरानले आफ्नो प्रस्तावमा होर्मुज जलमार्ग खोल्ने, बन्दरगाहमाथिको नाकाबन्दी हटाउने र आणविक विषयमा वार्ता अघि बढाउने कुरा राखेको थियो । तर अमेरिकी पक्षले इरानले पूर्ण रूपमा आफ्नो आणविक कार्यक्रम त्याग्नुपर्ने अडान राखेको छ ।

रिपोर्टअनुसार, इरानले तेल आपूर्तिका लागि महत्वपूर्ण होर्मुज जलमार्ग बन्द गरेपछि विश्व बजारमा असर परेको छ। साथै, इरानी मुद्रा रियाल पनि इतिहासकै कमजोर अवस्थामा पुगेको छ ।

तेहरानका नागरिकहरूले प्रतिबन्ध र वार्ताका कारण जीवन झन् कठिन बन्दै गएको प्रतिक्रिया दिएका छन् ।