काठमाडौं । क्षेत्रीय तनावबीच कूटनीतिक सक्रियता बढाइरहेको पाकिस्तानले अमेरिका–इरान शान्ति प्रयासमा संलग्न हुँदै आफ्ना प्रमुख साझेदारहरूसँग आर्थिक तथा रणनीतिक सम्बन्ध विस्तारमा ध्यान केन्द्रित गरेको छ ।
यसैक्रममा पाकिस्तानका प्रधानमन्त्री शाहबाज सरिफ उच्चस्तरीय प्रतिनिधिमण्डलसहित बुधबार साउदी अरबको औपचारिक भ्रमणमा प्रस्थान गरेका छन् ।
प्रधानमन्त्री सरिफ इस्लामाबादबाट जेद्दातर्फ प्रस्थान गरेको उनको कार्यालयले जनाएको छ । उक्त भ्रमणलाई द्विपक्षीय सम्बन्ध सुदृढीकरणसँगै क्षेत्रीय सुरक्षा र समसामयिक विषयमा उच्चस्तरीय छलफलका रूपमा हेरिएको छ ।
पाकिस्तान र साउदी अरबबीच लामो समयदेखि घनिष्ठ सम्बन्ध रहँदै आएको छ । हाल क्षेत्रीय तनाव बढिरहेको सन्दर्भमा इरानसँगको द्वन्द्व जोखिम र मध्यपूर्वको सुरक्षा अवस्थाले दुवै देशबीचको समन्वयलाई थप महत्वपूर्ण बनाएको छ ।
यसैबीच, पाकिस्तानको कमजोर विदेशी मुद्रा सञ्चिति मजबुत बनाउन साउदी अरबले थप आर्थिक सहयोग गर्ने प्रतिबद्धता जनाएको छ । पाकिस्तानको वित्त मन्त्रालयका अनुसार साउदी अरबले तीन अर्ब अमेरिकी डलर बराबरको अतिरिक्त निक्षेप उपलब्ध गराउने घोषणा गरेको छ, जुन आगामी हप्ताभित्र हस्तान्तरण हुने अपेक्षा गरिएको छ ।
अर्थ तथा राजस्वमन्त्री मुहम्मद औरङ्गजेबले उक्त सहयोगले देशको विदेशी मुद्रा भण्डार सुदृढ बनाउन महत्वपूर्ण योगदान पुर्याउने बताएका छन् । उनी हाल अन्तर्राष्ट्रिय मुद्राकोष (आईएमएफ) को वार्षिक वसन्त बैठकका लागि वासिङ्टनमा रहेका छन् ।
सरिफ प्रशासनका अनुसार साउदी अरबले यसअघि उपलब्ध गराएको पाँच अर्ब डलर निक्षेपलाई पनि अनिश्चित अवधिका लागि निरन्तरता दिने निर्णय गरेको छ ।
यसैबीच, पाकिस्तानले संयुक्त अरब इमिरेट्सतर्फ रहेको ठूलो ऋण भुक्तानी प्रक्रिया अघि बढाइरहेको उल्लेख गर्दै आर्थिक व्यवस्थापन र बाह्य वित्तीय सन्तुलन कायम गर्ने प्रयास जारी रहेको जनाएको छ ।
यो खबर पढेर तपाईलाई कस्तो महसुस भयो ?
प्रतिक्रिया