वासिङ्टन । अमेरिकी रक्षा मन्त्रालय (पेण्टागन) ले मध्यपूर्वमा थप १० हजार स्थल सैनिक परिचालन गर्ने योजना बनाइरहेको छ । यो कदम अमेरिकी राष्ट्रपति डोनाल्ड ट्रम्पलाई कूटनीतिक विकल्पबाहेक अतिरिक्त सैनिक विकल्प उपलब्ध गराउने उद्देश्यले उठाइएको हो ।
थप फौजमा पैदल सैनिकका साथै बख्तरबन्द वाहनहरू पनि समावेश हुने सम्भावना छ । यो नयाँ फौजले पहिले नै उक्त क्षेत्रमा तैनाथ पाँच हजार म्यारिन र ८२ औँ एयरबोर्न डिभिजनका हजारौँ पैराट्रुपरसँग मिलेर काम गर्नेछ ।
मध्यपूर्वमा यी फौज कहाँ पठाइने भन्ने विषय अझै स्पष्ट छैन, तर उनीहरू इरान र खार्ग द्वीप नजिकको क्षेत्रमा परिचालन हुने अपेक्षा गरिएको छ । खार्ग द्वीप इरानको तेल निर्यातको महत्वपूर्ण केन्द्र मानिन्छ ।
व्हाइट हाउसकी उप–प्रेस सचिव एना केलीले स्पष्ट पार्दै भनिन, ‘सैनिक परिचालनसम्बन्धी सबै घोषणा अमेरिकी रक्षा मन्त्रालयबाटै गरिनेछ । राष्ट्रपति ट्रम्पसँग सधैँ सबै सैनिक विकल्पहरू उपलब्ध छन् ।’
पूर्वअमेरिकी राष्ट्रपति ट्रम्पले बिहीबार इरानी ऊर्जा संयन्त्रमाथि योजना बनाइएका हमलाहरू १० दिनका लागि स्थगित गर्ने बताए । उनले अमेरिका र इरानबीचको वार्ता ‘अत्यन्तै सकारात्मक रूपमा अघि बढिरहेको’ पनि बताएका छन् ।
इरानले सार्वजनिक रूपमा व्हाइट हाउसको १५ बुँदे शान्ति योजना अस्वीकार गरेको छ । तर गोप्य वार्ता अनुसार, पाकिस्तानमा केही अमेरिकी वार्ताकारहरूसँग भेट गर्ने तयारी भइरहेको छ ।
फेब्रुअरी २८ मा अमेरिका र इजरायलले इरानमाथि ठूलो हमला गरेका थिए, जसले विश्वव्यापी ढुवानीमा अवरोध पु¥यायो, तेलको मूल्य बढायो र अन्तर्राष्ट्रिय अर्थतन्त्रमा प्रभाव पारेको थियो ।
यो खबर पढेर तपाईलाई कस्तो महसुस भयो ?
प्रतिक्रिया