काठमाडौं । दक्षिण कोरियाको डेइजोनमा स्थित अटो पार्टस उत्पादन गर्ने कारखानामा शुक्रबार भएको भीषण आगलागीमा कम्तीमा १० जनाको मृत्यु भएको छ भने ५९ जना घाइते भएका छन् ।
स्थानीय समयअनुसार दिउँसो करिब १स्१७ बजे आगो लागेको थियो, जस समयमा करिब १७० जना कामदार भवनभित्र कार्यरत थिए । अचानक फैलिएको आगोका कारण धेरै कामदारहरू भवनभित्रै फसेका थिए ।
अग्नि नियन्त्रण अधिकारीका अनुसार पहिलो पीडित दोस्रो तलामा हृदयघातको अवस्थामा फेला परेका थिए । र अस्पताल लैजाँदै गर्दा मृत घोषणा गरिएको थियो । अन्य नौ जनाको शव तेस्रो तलामा भेटिएको पुष्टि भएको छ । जसले आगो माथिल्लो तलासम्म फैलिएको संकेत गर्दछ ।
दमकल टोलीले आगो नियन्त्रणमा ल्याउन लामो समय संघर्ष गर्नुपर्यो । प्रारम्भिक उद्धार कार्य धुवाँ र उच्च तापक्रमका कारण कठिन भएको थियो। संरचना सुरक्षित रहेको पुष्टि भएपछि मात्र उद्धारकर्मीहरूले राति ढिलो गरी भवनभित्र प्रवेश गर्न सके।
हाल उद्धार टोलीले बेपत्ता चार जनाको खोजी कार्य तीव्र पारेको छ । घाइतेहरू नजिकैका अस्पतालमा उपचारका लागि पठाइएका छन्, जहाँ केहीको अवस्था गम्भीर रहेको छ ।
अधिकारीहरूले आगोको कारणबारे अनुसन्धान सुरु गरेका छन् । प्रारम्भिक अनुमान अनुसार औद्योगिक उपकरण वा ज्वलनशील पदार्थबाट आगो सुरु भएको हुन सक्ने आशंका गरिएको छ ।
स्थानीय प्रशासनले औद्योगिक सुरक्षा मापदण्ड कडाइका साथ पालना गर्न निर्देशन दिएको छ र यस्ता घटनाबाट बच्न कारखानाहरूमा सुरक्षा निरीक्षण बढाइने जनाएको छ ।
यो खबर पढेर तपाईलाई कस्तो महसुस भयो ?
प्रतिक्रिया