रुस–युक्रेन वार्तालाई लिएर ट्रम्प उत्साहित, भन्छन्– ‘केही हुनसक्छ’

काठमाडौं । अमेरिकी राष्ट्रपति डोनाल्ड ट्रम्पले रुस र युक्रेनसँग संयुक्त राज्य अमेरिकाले अत्यन्तै राम्रो वार्ता गरिरहेको बताएका छन् । करिब चार वर्ष चलिरहेको द्वन्द्वको समाधानको लागि उनले केही सकारात्मक नतिजा हुनसक्ने अपेक्षा व्यक्त गरे ।

ट्रम्पले अमेरिकाको मध्यस्थतामा रुस र युक्रेनबिच भएको वार्ता निकै राम्रो भइरहेको बताए तर थप विस्तृत विवरण प्रदान गरेनन् । दोस्रो चरणको वार्ता बिहीबार अबु धाबीमा सम्पन्न भएको थियो ।

वार्तामा दुवै पक्षले ठुलो संख्यामा बन्दीहरूको साटासाटमा सहमति जनाए पनि क्षेत्रीय व्यवस्था लगायत मुख्य विषयमा ठोस सहमति जुट्न सकेको छैन ।

यसैबिच, युक्रेनी राष्ट्रपति भोलोडिमिर जेलेन्स्कीले निकट भविष्यमा अर्को शान्ति वार्ता सम्भवतः संयुक्त राज्य अमेरिकामा आयोजना गरिने बताए ।