ट्रम्प र भेनेजुएलाका कार्यवाहक राष्ट्रपतिबिच लामो कुराकानी : सम्बन्ध सुधारको संकेत

काठमाडौं । अमेरिकी राष्ट्रपति डोनाल्ड ट्रम्पले भेनेजुएलाकी कार्यवाहक राष्ट्रपति डेलसी रोड्रिगेजसँग टेलिफोन वार्ता गरेका छन् । वार्तामा दुई पक्षले आपसी कूटनीतिक सम्बन्ध र तेल क्षेत्रमा सम्भावित सहकार्यबारे छलफल गरेका हुन् ।

ब्लुमबर्गको रिपोर्टअनुसार ट्रम्प प्रशासन भेनेजुएलामा आफ्नो दूतावास पुनः खोल्ने सम्भावनाबारे विचार गरिरहेको छ । यसै सन्दर्भमा, कार्यवाहक राष्ट्रपति रोड्रिगेजले बेलायतका लागि भेनेजुएलाका राजदूत फेलिक्स प्लासेन्सियालाई यसै हप्तामा वासिङ्टन पठाउने योजना बनाएकी छन् ।

त्यसै दिन भेनेजुएलाकी प्रमुख विपक्षी नेतृ मारिया कोरिना माचाडोले पनि ह्वाइट हाउस भ्रमण गर्ने अपेक्षा गरिएको छ । यसअघि अमेरिकी सेनाले भेनेजुएलासँग सम्बन्धित पाँचौँ तेल ट्याङ्कर नियन्त्रणमा लिइसकेको छ ।

गत जनवरी ३ मा अमेरिकी कारबाहीपछि भेनेजुएलाका राष्ट्रपति निकोलस मादुरोलाई नियन्त्रणमा लिइएको केही दिनपछि अमेरिकी कूटनीतिज्ञ र सुरक्षाकर्मीहरूको टोली काराकस पुगेको थियो, जसले दूतावास पुनः खोल्ने सम्भावना आकलन गरेको थियो ।

यसैबिच अमेरिकी ऊर्जा मन्त्री क्रिस राइटले भेनेजुएलामा भण्डारण गरिएको तेलको मात्र नभई देशको तेल उत्पादनको बिक्रीलाई अनिश्चितकालसम्म अमेरिकी नियन्त्रणमा राख्ने बताए ।