काठमाडौं । जापानकी नयाँ प्रधानमन्त्री साने ताकाइचीले संसद्मा पहिलो नीतिगत सम्बोधन दिँदै देशको रक्षा क्षमता अभिवृद्धि गर्ने र सैन्य खर्च बढाउने प्रतिबद्धता जनाएकी छन् ।
चीन, उत्तर कोरिया र रुससँग बढ्दो क्षेत्रीय तनावबीच उनले जापानको सुरक्षा रणनीति अद्यावधिक गर्ने योजना सार्वजनिक गरिन् ।
महिनौँ लामो राजनीतिक अनिश्चितता अन्त्य गर्दै सत्तामा आएकी ताकाइचीले सन् २०२७ भन्दा अघि रक्षा खर्चलाई कुल देशीय उत्पादनको दुई प्रतिशतमा पुर्याउने लक्ष्य राखेकी छन् ।
साथै, उनले जापानको आत्मरक्षा बललाई बलियो बनाउन आक्रामक रणनीति अघि बढाउने बताइन् । उनको घोषणा अमेरिकी राष्ट्रपति डोनाल्ड ट्रम्पको टोकियो भ्रमणअघि आएको हो, जहाँ दुई नेताबीच जापान–अमेरिका सम्बन्ध र रक्षा सहयोगबारे छलफल हुने अपेक्षा छ ।
ताकाइचीले अमेरिका सँगको गठबन्धन सुदृढ पार्ने र चीनसँग स्थिर सम्बन्ध कायम गर्ने प्रतिबद्धता जनाइन् । तर विश्लेषकहरूका अनुसार उनको राष्ट्रवादी दृष्टिकोणले टोकियो–बेइजिङ सम्बन्धमा चिसोपन ल्याउन सक्छ ।
घरेलु रूपमा उनले मुद्रास्फीति नियन्त्रण, स्थिर ज्याला दर र जनताको घट्दो खरिद क्षमता सन्तुलनमा ल्याउने लक्ष्य लिएकी छन् । साथै, श्रम अभाव समाधानका लागि विदेशी कामदार स्वीकृतिमा कानूनी कडाइ गर्ने बताइन् ।
उनका नीतिहरूले जापानलाई सुरक्षा, अर्थतन्त्र र सामाजिक नीतिका क्षेत्रमा नयाँ दिशातर्फ लैजाने विश्लेषकहरूको मूल्याङ्कन छ ।
यो खबर पढेर तपाईलाई कस्तो महसुस भयो ?
प्रतिक्रिया