पहलगाम हमला पश्चात् भारतको ‘अपरेसन सिन्दूर’ सम्पन्न, विदेश सचिवले के भने ?

नयाँ दिल्ली । भारतको विदेश मन्त्रालयले एक विशेष पत्रकार सम्मेलनमार्फत जम्मु–कश्मीरको पहलगाममा अप्रिल २२ मा भएको आतंकवादी आक्रमणको सन्दर्भमा भारतले ‘अपरेसन सिन्दूर’ नाम दिइएको एक सशस्त्र कारबाही सम्पन्न गरेको जानकारी दिएका छन् । विदेश सचिव विक्रम मिस्रीले उक्त कारबाही भारतको सुरक्षाका लागि पूर्व तयारी, रोकथाम र प्रतिकारका उद्देश्यले गरिएको बताएका छन् ।

पहलगाम आक्रमणको पृष्ठभूमि

विदेश सचिवका अनुसार, अप्रिल २२ मा जम्मु–कश्मीरको पहलगाममा पर्यटकहरूलाई लक्षित गरी भएको आक्रमणमा २८ जनाको मृत्यु भएको थियो, जसमा एक जना नेपाली नागरिक समेत थिए । भारतले उक्त घटनालाई पछिल्ला वर्षहरूमा देशभित्र भएको सबैभन्दा घातक आतंकवादी आक्रमणमध्ये एक मानेको छ ।

उक्त घटनामा पीडितहरूलाई नजिकबाट गोली प्रहार गरिएको र आक्रमण निकै योजनाबद्ध ढङ्गले गरिएको प्रारम्भिक अनुसन्धानबाट देखिएको भारतको दाबी छ ।

आक्रमणको जिम्मा टिआरएफले लिएको थियो

भारतका अनुसार, ‘द रेसिस्टेन्स फ्रन्ट’ (टिआरएफ) नामक समूहले हमलाको जिम्मेवारी लिएको थियो । भारतले उक्त समूहलाई पाकिस्तानस्थित आतंकवादी संगठन लस्कर–ए–तैयबासँग सम्बद्ध रहेको दाबी गरेको छ । साथै, भारतले यसअघि पनि संयुक्त राष्ट्रसंघको प्रतिबन्ध समितिमा टिआरएफ र यस्ता समूहहरूको गतिविधिबारे जानकारी गराएको उल्लेख गरिएको छ ।

भारतको कारबाही : ‘अपरेसन सिन्दूर’

विदेश सचिवले बताएअनुसार, अप्रिल २२ को घटनापछि भारतले आवश्यक आन्तरिक मूल्याङ्कन पश्चात् मे ७ बिहानै ‘अपरेसन सिन्दूर’ नामक कारबाही आरम्भ गरेको हो । उक्त कारबाहीको उद्देश्य सम्भावित सीमापार आक्रमण रोक्नु तथा सुरक्षालाई सुनिश्चित गर्नु रहेको दाबी गरिएको छ ।

सचिव मिस्रीले यो कारबाहीलाई ‘आकलित, अनुशासित र सीमित दायरामा सम्पन्न गरिएको’ बताएका छन् । कारबाही विशेष गरी सुराकी आधारमा लक्षित पूर्वाधार विरुद्ध केन्द्रित रहेको जनाइएको छ ।

अनुसन्धानको प्रगति

विदेश सचिवले हमलामा संलग्न समूह र व्यक्तिहरूको पहिचानको प्रक्रिया अघि बढिरहेको र यसबारे विभिन्न सुरक्षा तथा गुप्तचर निकायले अनुसन्धान गरिरहेको जानकारी दिएका छन् । साथै, आक्रमणमा प्रयोग गरिएका उपाय, सञ्चार माध्यममा गरिएको समन्वय र सोसल मिडियामा देखिएका गतिविधिहरूबाट घटनाको प्रकृति पुष्टि हुँदै गएको बताइएको छ ।

अन्तर्राष्ट्रिय सन्दर्भ र प्रतिक्रिया

विदेश सचिवले संयुक्त राष्ट्रसंघ सुरक्षा परिषद्ले अप्रिल २५ मा जारी गरेको प्रेस वक्तव्यलाई उद्धृत गर्दै ‘आतंकवादका दोषीहरूलाई जबाफदेही बनाइनुपर्ने’ माग गरेको स्मरण गराएका छन् । भारतले आफ्नो पछिल्लो कारबाहीलाई सो अन्तर्राष्ट्रिय सन्दर्भमा हेर्न आग्रह गरेको छ ।

सैन्य अधिकारीहरूको सहभागिता

प्रेस बिफ्रिङमा भारतीय सेनाका कर्णेल सोफिया कुरैशी र वायुसेना विङ कमाण्डर व्योमिका सिंह समेत सहभागी भएका थिए । उनीहरूले ‘अपरेसन सिन्दूर’को सैन्य पक्षका विषयमा जानकारी दिएका थिए ।